ලොවටම තර්ජනයක් වී තිබෙන අයි.එස් ත්‍රස්ත සංවිධානයට නව නායකයකු තෝරා ගැනීම සඳහා එම සංවිධානයේ ඉහළ නායකයන් හදිසි රැස්වීමක් කැඳවා ඇතැයි ඬේලිමේල් පුවත්සේවය වාර්තා කරයි. 

ප්‍රහාරයකින් අයි.එස් ත්‍රස්ත සංවිධානයේ නායකයා මියගොස් ඇතැයි ද එබැවින් නව නායකයකු තෝරා ගැනීම මෙලෙස හදිසි රැස්වීමක් කැඳවා ඇතැයි ද එම ආරංචි මාර්ග සඳහන් කරයි. 

අයි.එස් ත්‍රස්ත සංවිධානයේ සියලු නායකයන් ඉරාකයේ මෙලෙස හමු වී සාකච්ඡා කරන බවට ලන්ඩනය පදනම් කරගත් මානව හිමිකම්  සඳහා වූ සිරියානු නිරීක්ෂණ කණ්ඩායමට තොරතුරු ලැබී ඇතැයි එම සංවිධානය උපුටා දක්වමින් ජෙරුසලෙම් පෝස්ට් පුවත් සේවය වාර්තා කර ඇත. 

නව නායකයකු පත් කරගන්නේ ඇයි ද තවමත් නිශ්චිත නොමැති නමුත් ඉරාක හමුදා හා මිත්‍ර පාර්ශව ඉරාකයේ මොසුල් නුවර මුදා ගැනීම සඳහා කරන මෙහෙයුම්වලදී අයි.එස් අබු බකර් අල් බැග්ඩෑඩි මිය යන්නට ඇතැයි එම වාර්තා තවදුරටත් සඳහන් කරයි.

අයි.එස් නායකයා ජීවතුන් අතර නම් ඔහු සැඟව සිටින්නේ කොහිදැයි තවමත් නිශ්චිතව අනාවරණය වී නැත.  

මෙහෙයුම්වලදී කිසිසේත් පසු නොබසින්නැයි පසුගිය මාසයේදී අල් බැග්ඩෑඩි හඬ පටයක් නිකුත් කරමින් තම සටන්කරුවන්ගෙන් ඉල්ලා සිටියේය. මොසුල් නුවර ඉරාක හමුදා අතට හසු වුවහොත් අයි.එස් සංවිධානයේ රහස් හෙළිකරනු ඇතැයි බියෙන් අල් බැග්ඩෑඩි තම හිතවතකු ඝාතනය කළ බව ද විදෙස් වාර්තාවල දැක්විණි. 

අල් බැග්ඩෑඩි පසුගිය ඔක්තෝබර් මාසයේදී ආහාර විසවීමක් රෝගාතුර වූ බවත් ඔහු ඇතුළු පිරිසක් රහස්‍ය ස්ථානයක් වෙත ගෙන ගිය බවත් වාර්තා විය. ඝාතකයකු අයි.එස් නායකයාගේ සහ එම සංවිධානයේ අණ දෙන්නන් තිදෙනකුගේ ආහාරවලට විස එක් කිරීමෙන් ඔවුහු දැඩි ලෙස රෝග තුර වූහ. 

ඉරාක හමුදා සහ මිත්‍ර පාර්ශව මොසුල් නුවර මුදා ගැනීමේ මෙහෙයුම් ආරම්භ කිරීමත් සමඟ අයි.එස් නායකයා ගුවන් ප්‍රහාරවලින් බේරීමට ප්‍රාණ ඇපකරුවන් 150 කු සමඟ පැනගිය බව තවත් වාර්තාවක දැක්විණි. 

කෙසේ වෙතත් අයි.එස් නායකයා සම්බන්ධයෙන් ලැබෙන තොරතුරු කිසිවක් නිශ්චිත නොමැති අතර මීට පෙර ද ඔහු ඝාතනය වූ බවට තුවාල වූ බවට පුවත් වාර්තා විය.