සෞදියෙන් මිලියන 2560 ක ආධාර
දැනට ක්‍රියාත්මක කළුගඟ සංවර්ධන ව්‍යාපෘතියේ අපේක්ෂිත වියදම ඇතුලු විවිධ හේතූන් මත ඉහළ ගොස් ඇති බැවින් සංවර්ධනය සඳහා වන සෞදි අරමුදල විසින් එහි හිඟයෙන් කොටසක් මූල්‍යයනය කිරීම සඳහා සෞදි රියාල් මිලියන 60ක (ශ්‍රී ලංකා මුදලින් රුපියල් මිලියන 2,560 අතිරේක ණය මුදලක් ලබා දීමට එකඟ වී ඇතැයි මුදල් අමාත්‍යාංශය සඳහන් කරයි.
අරමුදල් හිඟයෙන් ඉතිරි කොටස මූල්‍යයනය කිරීම සඳහා ශ්‍රී ලංකා රජය දැනටමත් අරාබි ආර්ථික සංවර්ධනය සඳහා කුවේට් අරමුදල සහ ජාත්‍යන්තර සංවර්ධනය සඳහා වන ඔපෙක් අරමුදල සමඟ ගිවිසුම්වලට එළඹ ඇත.
සෞදි රියාල් මිලියන 60ක් වූ අතිරේක ණය මුදලට අදාළ ගිවිසුම 18 දා මුදල් අමාත්‍යාංශයේ දී අත්සන් කරන ලදි.
මුදල් හා ජනමාධ්‍ය අමාත්‍යාංශයේ ලේකම් ආචාර්ය ආර්.එච්.එස්.සමරතුංග මහතා සහ සංවර්ධනය සඳහා වන සෞදි අරමුදලෙහි නියෝජ්‍ය සභාපති හා කළමනාකාර අධ්‍යක්ෂ යූසුෆ් ඉබ්‍රහීම් අල් අබ්දුල් රහමාන් අල් බසාම් මහතා ගිවිසුමට අත්සන් තැබූහ.
සංවර්ධනය සඳහා වන සෞදි අරමුදල අරාබි ආර්ථික සංවර්ධනය සඳහා කුවේට් අරමුදල හා ජාත්‍යන්තර සංවර්ධනය සඳහා වන ඔපෙක් අරමුදල යන සංවිධානවල මූල්‍ය සහය ඇතිව කළුගඟ සංවර්ධන ව්‍යාපෘතිය, මහවැලි සංවර්ධන හා පරිසර අමාත්‍යාංශය විසින් දැනට ක්‍රියාත්මක කරනු ලබයි.
මෙම ව්‍යාපෘතිය සඳහා වූ අපේෂිත වියදම බලාපොරොත්තු නොවූ භූවිද්‍යාත්මක තත්ත්වයන් ඇතුලු විවිධ හේතූන් මත සිදු කරන ලද සැලසුම් සංශෝධනයන් නිසා ඉහළ ගොස් ඇති බැවින් ඉහත පාර්ශවකරුවන් විසින් සපයන ලද අරමුදල් මෙම ව්‍යාපෘතිය අවසන් කිරීම සඳහා ප්‍රමාණවත් නොවන බව හඳුනාගෙන ඇත.
යෝජිත කළුගඟ ජලාශයේ ජල ධාරිතාවය ඝන මීටර් මිලියන 265 වන අතර ඉන් ඝන මීටර් මිලියන 100ක් වාර්ෂිකව මොරගහකන්ද ජලාශයට හැරවීමට හැකිවේ. මෙම ව්‍යාපෘතිය යටතේ කළුගඟ ද්‍රෝණියේ හෙක්ටයාර 3,000කනව වාරි ප්‍රාදේශයක් වර්ධනය කිරීමට අපේක්ෂා කෙරේ.
( තිළිණි ද සිල්වා)
