හේතුව රහස් න්‍යෂ්ටික අත්හදා බැලීම්
මීට දින කීපයකට, පසුගිය ඔක්තෝබර් 5 වැනිදා රාත්‍රී 10.45 ට පමණ, ඉරානය රික්ටර් මාපකයේ 4.6 ක් ප්‍රබල භූමි කම්පාවකින් දෙදරා ගියේය.
භූමි කම්පාවේ අපිකේන්ද්‍රය සටහන් වූයේ ඉරානයේ, සෙම්නාන් පළාතේ, ඇරඩාන් නගරයට නුදුරින් කිලෝ මීටර් 10 ක් භූගතවය. එම භූමි කම්පාවේ ප්‍රබලත්වය, කිලෝ මීටර් 110 ක් දුරින්, ඉරානයේ ටෙහෙරාන් අගනුවරට ද දැනුණු බව පැවැසෙයි.
ඊශ්‍රායලය සැක පළ කර ඇත්තේ, ඉරානය දෙදෙරා ගිය එම භූමි කම්පාවට හේතුව ඉරාන විප්ලවීය හමුදා, රහසේ භූගතව න්‍යෂ්ටික අවි අත්හදා බැලීම් කළ නිසා බවය. ඉරානය න්‍යෂ්ටික අවි අත්හදා බලන්නේ ඉරානයට ප්‍රහාරයක් එල්ල කිරීමේ අරමුණින් යැයි ද ඊශ්‍රායලය වැඩි දුරටත් චෝදනා කර ඇත.
ඉරානය සහ ඇමෙරිකාව අතරේ අර්බුදකාරී තත්ත්වයක් පවතින්නේ ද ඉරාන න්‍යෂ්ටික වැඩසටහන මුල්කොට ගනිමිනි. ඉරානය ඔවුන්ගේ න්‍යෂ්ටික වැඩසටහන ආරම්භ කර ඇත්තේ, රටේ බලශක්ති අර්බුදයට පිළියමක් ලෙසය. කෙසේ නමුත් ඊශ්‍රායලය චෝදනා කරන්නේ, ඉරානය ඔවුන්ගේ එම න්‍යෂ්ටික වැඩසටහනට මුවා වී රහසේ න්‍යෂ්ටික අවි නිපදවන බවටය.
මේ අතර පසුගිය දා ඉරානය ඊශ්‍රායලයට එල්ල කළ මිසයිල ‘වරුසාව’ ට ප්‍රතිචාර දැක්වීමක් ලෙස, ඉරානයට ප්‍රහාරයක් එල්ල කර, ඉරාන රෙජීමය අඩපණ කිරීමට පියවර ගන්නා බව ඊශ්‍රායලය පවසා ඇත.
