ට්‍රම්ප් හමාස් සංවිධානයට තර්ජනය කරයි
හමාස් ග්‍රහණයේ පසුවන, ඊශ්‍රායල ප්‍රාණඇපකරුවන් සියලු දෙනා ලබන 20 වැනිදාට පෙර වහාම නිදහස් කළ යුතු බවටත්, හමාස් සංවිධානය එසේ නොකරන්නේ නම්, ඔවුන්ට දරුණු විදියේ ඵලවිපාකවලට මුහුණ දීමට සිදුවනු ඇති බවටත් ඇමෙරිකන් ජනාධිපති ධුරයට තේරී පත් වී සිටින ඩොනල්ඩ් ට්‍රම්ප් තර්ජනය කරයි.
ඇමෙරිකාවේ ජනාධිපති ධුරයට තේරී පත් වී සිටින ට්‍රම්ප්, ඇමෙරිකාවේ 47 වැනි ජනාධිපති ලෙස දිවුරුම් දෙන්නේ ලබන 20 වැනිදාය.
ට්‍රම්ප්, හමාස් සංවිධානයට අනතුරු අඟවා ඇත්තේ, එදින වනවිට ප්‍රාණ ඇපකරුවන් නිදහස් නොකරන්නේ නම්, හමාස් සංවිධානයට තමන්ගෙන් කිසිදු සමාවක් නොලැබෙනු ඇති බවය
‘මා දන්නවා මේ වනවිට ඊශ්‍රායල රජයත්, හමාස් සංවිධානයත් අතරේ සාකච්ඡා පැවැත්වෙනවා. ඊශ්‍රායල ප්‍රාණ ඇපකරුවන් නිදහස් කර ගන්නයි. ප්‍රාණඇපකරුවන් 34 දෙනකු මුදා හැරීමට හමාස් කැමැත්ත පළ කර තිබෙනවා. ඒත් එහෙම බැහැ. මා ජනපති ධුරයේ දිවුරුම් දෙන්න කලින් හමාස් ග්‍රහණයේ සිටින සියලුම ප්‍රාණ ඇපකරුවන් මුදා හරින්න හමාස් සංවිධානය බලාගත යුතුයි’ යැයි ට්‍රම්ප් පැවැසුවේ ෆ්ලොරීඩාවේ, සිය මාර් ආ ලාගෝ මන්දිරයේ සිට මාධ්‍ය හමුවකට එක් වෙමිනි.
ට්‍රම්ප්, මැදපෙරදිග කලාපයට විශේෂ නියෝජිතයකු ලෙස ස්ටීවන් චාල්ස් විට්කෝෆ් පත් කර ඇති අතර, විට්කෝෆ් මැදපෙරදිග සංචාරයක් අවසන් කර මේ වනවිට යළි ඇමෙරිකාව බලා පැමිණ සිටී. විට්කෝෆ් මැදපෙරදිග කලාපයට ගියේ ට්‍රම්ප්ගේ උපදෙස් අනුව, ඊශ්‍රායල හමාස් අර්බුදය ගැන සොයා බැලීමටය.
(ඒ.එෆ්.පී.)
