ගොඩබිම් ප්‍රහාරයකට සූදානම්
තමන් සතු සියලුම හමුදා ශක්තිය යොදා ගනිමින්, ලෙබනනයේ හිස්බුල්ලා සටන්කාමීන් පරාජය කරන බවත්, දකුණුදිග ලෙබනනයේ හිස්බුල්ලා සටන්කාමීන්ට එරෙහිව ගොඩබිම සටන් ආරම්භ කිරීමට සූදානම් බවත් ඊශ්‍රායලය අනතුරු අඟවා තිබේ.
හිස්බුල්ලා සටන්කාමීන්ට එරෙහි යුද්ධයේ මීළඟ අදියර ඉක්මණින් ආරම්භ වීමට නියමිතයි යැයි ඊශ්‍රායල ආරක්ෂක අමාත්‍ය යෝවි ගැලට් පැහැදිලි කර ඇත්තේ උතුරු ඊශ්‍රායලයේ පළාත් පාලන නිලධාරීන් හමුවෙමිනි.
ඊශ්‍රායලය ලෙබනනයට මායිම් වන්නේ උතුරු දෙසිනි. මේ වනවිට ඊශ්‍රායල ලෙබනන් දේශසීමාවේ ඊශ්‍රායල හමුදා බලඇණි ගොඩබිම් ප්‍රහාරයකට සුදානමින් සීරුවෙන් සිටින බව ද වාර්තා වේ.
මේ අතර ගතවුණු පැය 24 ක කාලයේ, ඊශ්‍රායල ගුවන් හමුදා ලෙබනනයට එල්ල කළ ප්‍රහාරවලින් ලෙබනන් වැසියන් 136 දෙනකු මියගිය බව ලෙබනන් සෞඛ්‍ය අමත්‍යාංශය නිකුත් කළ නිවේදනයක දැක්වෙයි. ඊට අමතරව මියගිය පිරිස අතරේ, පලස්තීන හමාස් සංවිධානයේ ලෙබනන් නායකයන් තිදෙනකු ද සිටින බව මේ වනවිට තහවුරු වී ඇත.
නොකඩවා එල්ල වන ඊශ්‍රායල ප්‍රහාර හේතුවෙන් ලෙබනනයට යෑමෙන් වළකින්නැයි රටවල් රැසක් ඔවුන්ගේ වැසියන්ට දැනුම් දී ඇති අතර, ඇමෙරිකාව, බ්‍රිතාන්‍යය, ප්‍රංශය ආදී රටවල් ලෙබනනයේ සිටින තම වැසියන් කඩිනමින් ගෙන්වා ගැනීමට ද කටයුතු කර තිබේ. ගුවන් යානා බොහොමයක් මේ වනවිට ලෙබනනයට යෑම නවතා දමා ඇතැයි ද පැවැසෙයි.
(ඒ.එෆ්.පී.)
