ඩෙංගු මර්දනයට උපදෙස්
නිරෝගීකම රැක ගැනීම සඳහා අප ගන්නා ආහාර පාන සේම භාහිර සාධක ගැනත් අපි නිරන්තරයෙන් විමසිලිමත් විය යුත්තෙමු. පෝෂණය මෙන්ම වටපිටාවේ පිරිසුදුතාවද නිරෝගී දිවි පෙවෙතකට අත්‍යවශ්‍යම වේ.
අපි කෙතරම් ශරීර සෞඛ්‍ය ගැන හිතුවද වටපිටාව පිරිසුදු නැතිනම් නිතරම විවිධ රෝගවලට ගොදුරු වීමටත්, අපිරිසුදු පරිසරයේ සතුන් බෝවීම නිසා වරින් වර අසනීප වීමටත් අපට සිදු වේ.
අපිරිසුදු පරිසරය මදුරුවන්ගේ ගහණය වැඩි වීමට කදිම තෝතැන්නක් මෙන්ම එමගින් සම්ප්‍රේෂණය වන ලෙඩද ගණනාවකි. ඒ අතර ඩෙංගු රෝගය විශේෂයෙන් සඳහන් කළ හැක්කේ වරින් වර මේ කාලයේදී මතුව ආ බැවිනි. ඩෙංගු මර්දනය සඳහා සැවොම ඇති කර ගත යුතු සෞඛ්‍ය පුරුදු ගැන අද කතා කරමු.
මර්දනය උදෙසා අපේ සූදානම
♦ මදුරුවන් බෝවන ස්ථාන විනාශ කරන්න.
♦ ඔබ නිවසින් බැහැර වෙද්දී ලා වර්ණ ඇඳුම් තෝරා ගන්න. සුදු පැහැය වැනි ලා වර්ණ ඇඳුම් සුව පහසු වේ.
ඒවාද ඇඟට හිර නොවන සේ බුරුල්ව පහසුවෙන් තිබීම සුදුසු ය. එවිට මදුරු දෂ්ඨනයකදී සෘජුවේම අපේ සම සමඟ සම්බන්ධ නොවේ.
♦ මදුරු විකර්ෂක ආලේපන භාවිත කරන්න.
♦ නිදා ගන්නා විට මදුරු දැල් භාවිත කරන්න.
♦ ඔබට උණ ගැනී හෝ සිරුරේ ළප කැළැල් මතුවේ නම් කුමන හෝ අසනීප තත්ත්වයක් ඇත් නම් නොපමාව වෛද්‍ය උපදෙස් ලබා ගන්න.
♦ උණ තත්ත්වය ඇති අවස්ථාවලදී පැරසිටමෝල් ඖෂධය පමණක් ලබා ගන්න. එයද පැය 6න් 6ට නියමිත පරිමාවෙනි. ඒ හැරුණු කොට වෙනත් ඖධෂ හිතුමතයට ගැනීමෙන් වලකින්න. එසේ නොවුණොත් ඔබ ඔබටම කර ගන්නා හානියකි.
♦ ඩෙංගු කම්පන තත්ත්වය දක්වා රෝගය ඔඩු දිවගියහොත් ශරීරයේ තැනින් තැන රුධිරය ගලා ඒම, හුස්ම ගැනීමේ අපහසුතා ,රතු ලප දැමීම වැනි තත්ත්ව ඇතිවිය හැකියි. පුද්ගල මරණ පවා සිදුවිය හැකියි. ඔබ ඔබ ගැන මෙන්ම පරිසරයේ පිරිසුදුතාවත් රැක ගැනීමට උනන්දු වන්න. එය අපේ දෛනික පුරුදු අතර ප්‍රධානම පුරුද්දක් බවටත් පත් කර ගන්න.
මාධවී ධර්මරත්න
