ආලෝකය අල්ල ගත්තු හැටි
ආලෝකය අල්ලා ගැනීමට නැතිනම් කැටි කර ගැනීමට විද්‍යාඥයෝ පිරිසක් සමත් වී සිටිති. මෙය විද්‍යාත්මක වශයෙන් සුවිශේෂී වැදගත් සිදුවීමකි.
සාමාන්‍යයෙන් ආලෝකය තරංගයක් හෝ අංශුවක් ලෙස පවතින අතර, එහි ඝන තත්ත්වයෙන් පවතින දෙයක් නොවෙයි. ඉතාලි ජාතික විද්‍යාඥයෝ පිරිසක්, ආලෝකයේ මූලික අංශු වන ෆෝටෝන - අතිශය අඩු උෂ්ණත්වයකදී, ඉතා සූක්ෂමව, ව්‍යුහගත පරිසරයක් තුළ එක් තැනකට සීමා කිරීමට සමත් වී සිටිති.
උසස් ක්වොන්ටම් භෞතික විද්‍යා ශිල්පීය ක්‍රම හරහා, විද්‍යාඥයින් ෆෝටෝන චලන පාලනය කර මන්දගාමී කළ අතර, පසුව ඒවා ඝන වස්තුවක් බවට පත් කෙරුණි.
විද්‍යාඥයන්ගේ මෙම 'හපන්කම' ඉදිරි ගමන අනාගත තාක්ෂණයන් සඳහා, විශේෂයෙන් ක්වොන්ටම් පරිගණනය, දෘශ්‍ය සන්නිවේදනය සහ උසස් ද්‍රව්‍ය විද්‍යාව සඳහා අතිමහත් ලෙස වැදගත් වනු ඇති බව පැවැසෙයි.
ආලෝකය ඝන ද්‍රව්‍යයක් බවට පත් කිරීමෙන්, විද්‍යාඥයන්ට පෙර නොවූ විරූ වේගයකින් තොරතුරු ගබඩා කිරීම සහ සැකසීම, දත්ත සම්ප්‍රේෂණය සහ පරිගණක හැකියා නැවත සකස් කිරීම සඳහා නව්‍ය ක්‍රම සකස් කිරීමට මඟ පෑදෙනු ඇත.
මෙම සොයා ගැනීම න්‍යායාත්මක වැදගත්කම ඉක්මවා යන අතර, ආලෝකයේ සහ පදාර්ථයේ මූලික ස්වභාවය අවබෝධ කර ගැනීමේ වැදගත් පියවරක් සනිටුහන් කරයි.
ලයිව් සයන්ස් ඇසුරිනි
