මෝදි ආපසු ඉන්දියාවේ
සය දින විදෙස් නිල සංචාරය අවසන් කරමින් ඉන්දීය අග්‍රාමාත්‍ය නරේන්ද්‍ර මෝදි යළි ඉන්දියාව බලා පැමිණියේය.
නවදිල්ලි අගනුවර අභිනවයෙන් ඉදිවුණු ඉන්දීය පාර්ලිමේන්තු ගොඩනැගිල්ල විවෘත කිරීම මෝදි අතින් සිදුවීමට නියමිත අතර, ඉන්දීය විපක්ෂ දේශපාලන කණ්ඩායම් එම උත්සවය වර්ජනය නිරීමට තීරණය කර තිබේ. මෙය අග්‍රාමාත්‍ය මෝදිගේ දැඩි විරෝධයට හේතුවක් වී ඇතැයි ඉන්දීය මාධ්‍ය වාර්තා පෙන්වා දෙයි.
පසුගිය සිකුරාදා ඉන්දියාවෙන් පිටත්ව ගිය අග්‍රාමාත්‍ය නරේන්ද්‍ර මෝදි 23 වැනිදා ඕස්ටේ්‍රලියාවට පැමිණියේය. ඒ, ජපානයේ සහ පැපුවා නිව්ගිනියාවේ සංචාරය කිරීමෙන් පසුවය.
අග්‍රාමාත්‍ය මෝදි ජපානයේ හිරෝෂියා නගරයට ගියේ ජී7 සමුළුවට ආරාධිත රාජ්‍ය නායකයකු ලෙස සහභාගී වීමටය. හිරෝෂිමා නුවර පැවැති ‘ජී7’ සමුළුවේදී, ඉන්දීය අග්‍රාමාත්‍යවරයා අනෙක් රටවල් සමඟ සාමය, ස්ථාවරත්වය, සහ සෞභාග්‍ය සම්බන්ධයෙන් මෙන්ම ආහාර, පොහොර, බලශක්තිය, දේශගුණික විපර්යාස සහ පරිසරය සහ සංවර්ධනය සහයෝගීතාව සම්බන්ධයෙන් අනෙකුත් රටවල් සමඟ සාකච්ඡා පැවැත්වීය.
ඉන් අනතුරුව පැපුවා නිව්ගිනියාවට පැමිණියේය. ඉන්දීය අග්‍රාමාත්‍යවරයකු පැපුවා නිව්ගිනියාවට පැමිණි පළමු අවස්ථාව මෙය විය. පැපුවා නිව් ගිනියාවේ පැවැති ඉන්දු-ශාන්තිකර දූපත් සහයෝගීතාව සමුළු සම්මේලනයේ සම සභාපතීත්වය හෙබවූයේ ද මෝදිය.
පැපුවා නිව්ගිනියා සංචාර අවසන් කරමින් ඉන්දීය අග්‍රාමාත්‍යවරයා ඕස්ට්‍රේලියාවේ සිඩ්නි නුවර බලා පැමිණියේය. ඕස්ට්‍රේලියා අග්‍රාමාත්‍ය ඇන්තනි ඇල්බනීස්ගෙන් මෝදි හිමිවූයේ උණුසුම් පිළිගැනීමකි. ද්වී පාර්ශ්වික සබඳතා ශක්තිමත් කර ගැනීමට රාජ්‍ය නායකයෝ දෙදෙනා සාකච්ඡා පැවැත්වූහ.
(එන්.ඩී.ටීවී.)
