මහජන ආරක්ෂක ප්‍රධානියා අත්අඩංගුවට ගන්න නියෝග
බ්‍රසීල හිටපු ජනාධිපති බොල්සොනාරෝගේ ආධාරකරුවන් ඉරිදා දින බ්‍රසීල පාර්ලිමේන්තුවට, ශ්‍රේෂ්ඨාධිකරණයට සහ ජනාධිපති මන්දිරයට කඩා වදින අවස්ථාවේ බ්‍රසීලියා නගරයේ මහජන ආරක්ෂාව පිළිබඳ වගකීම දැරූ ප්‍රධානියා වූ ඇන්ඩර්සන් ටොරෙස් අත් අඩංගුවට ගන්නා ලෙස ශ්‍රේෂ්ඨාධිකරණ විනිසුරු ඇලෙක්සැන්ඩර් ඩි මොරායස් නියෝග කර ඇතැයි ආරංචි මාර්ග ප්‍රකාශ කළ බව විදෙස් මාධ්‍ය වාර්තා කර ඇත.
ඇන්ඩර්සන් ටොරෙස් හිටපු ජනාධිපති බොල්සොනාරෝගේ රජයේ අධිකරණ අමාත්‍යවරයා ලෙස කටයුතු කර තිබේ. ඇන්ඩර්සන් ටොරෙස් මහජන ආරක්ෂක ප්‍රධානී ධුරයෙන් පසුගිය ඉරිදා ඉවත් කළත් ටොරෙස් නිවාඩුවක් ගත කිරීම සඳහා මෙම මස මුලදී ඇමෙරිකා එක්සත් ජනපදයට ගොස් ඇති බවත් විදෙස් මාධ්‍ය පෙන්වා දී තිබේ.
ඇමෙරිකාවේ සිට පැමිණි පසු තමන් පොලිසියට බාර වෙන බව ඇන්ඩර්සන් ටොරෙස් සිය ට්විටර් ගිණුමේ සටහනක් තබමින් ප්‍රකාශ කර ඇත.එසේම ශ්‍රේෂ්ඨාධිකරණ විනිසුරු ඇලෙක්සැන්ඩර් ඩි මොරායස් බ්‍රසීලියා නගරයේ හමුදා පොලිසියේ ප්‍රධානී ෆැබියෝ ඔගොස්ටෝ වියෙරා අත් අඩංගුවට ගන්නා ලෙසද නියෝග කර ඇතැයි විදෙස් මාධ්‍ය සඳහන් කර තිබේ.
(රොයිටර්)
