චීන ජාතිකයන්ට ජපාන සරණාගතභාවය
චීන ජාතිකයන් සැලකිය යුතු පිරිසක් පසුගිය වසරේ දී ජපානයේ සරණාගත තත්ත්වය ලබාගෙන ඇතැයි වාර්තා වේ. චීනය තුළ ආගමික හිංසාවලට ලක්වන පුද්ගලයන් සහ වෙනත් ආගමික මත දැරීම නිසා පීඩාවට පත්වන පුද්ගලයන් මෙලෙස ජපානයට පැමිණ සරණාගත තත්ත්වයට ඉල්ලුම් කර ඇත.
මෙසේ ජපානයේ සරණාගත තත්ත්වය හිමිකරගත් බොහෝ දෙනා බටහිර චීනයේ ෂිංජියැන්ග් හි ජීවත් වූ අය වෙති චීනය උයිගර් මුස්ලිම් වැසියන් ඇතුළු ආගමික සුළු ජන කොටස් සමූල ඝාතනය කරන බවට චෝදනා එල්ල වී තිබෙන ඔවුන්ගෙන් බොහෝ දෙනා ජීවත් වන්නේ මෙම ෂිංජියැන්ග් කලාපයේ ය.
ජපානය පසුගිය වසරේ දී විදේශිකයන් 47 දෙනකුට සරණාගත තත්ත්වය ලබා දී ඔවුන්ට ජපානයේ රැඳී සිටීමට අවසර ලබා දී ඇතැයි ජපානයේ ආගමන සේවා ආයතනයේ දත්ත උපුටා දක්වමින් ‘සවුත් චයිනා මෝර්නිං පෝස්ට්’ පුවත් වෙබ් අඩවිය වාර්තා කර තිබිණි. ඔවුන්ගෙන් 11 දෙනකු චීන ජාතිකයන් යැයි ද එම වාර්තාවේ දැක්විණි.
සරණාගත තත්ත්වය හිමි පුද්ගලයන්ට නිසි පරිදි නොසැලකීම සහ සරණාගත තත්ත්වය ඉල්ලුම් කරන පුද්ගලයන් සම්බන්ධයෙන් ප්‍රමාණවත් අවධානයක් යොමු නොකිරීම සම්බන්ධයෙන් ජපානයට පසුගිය කාලයේ චෝදනා එල්ල විය. ජපානය 2019 වසරේ සරණාගත තත්ත්වය ලබා දී ඇත්තේ පුද්ගලයන් 44 දෙනකුට පමණි.
කෙසේ නමුත් එම වසරේ දී ජර්මනිය සරණාගත තත්ත්වය ලබා දී ඇති පුද්ගලයන්ගේ ගණණ 53,973කි. ඇමෙරිකාව එරට තුළ පදිංචි වීමට පුද්ගලයන් 44,614 දෙනකුට අවසරය ලබා දී තිබෙන අතර ප්‍රංශය අවසර දී පුද්ගලයන්ගේ ගණන 30,000කි. ජපානයේ මේ වනවිට චීන ජාතිකයන්ට වැඩි වශයෙන් සරණාගත තත්ත්වය දිය යුතු යන ස්ථාවරය පැමිණ ඇතැයි වාර්තා වේ.
චීන ජාතිකයන් 308 දෙනකු, 2018 වසරේ දී ජපානයේ සරණාගත තත්ත්වය සඳහා අයඳුම් කර ඇති අතර එයින් අවසර ලැබී ඇත්තේ පුද්ගලයන් සිවුදෙනකුටට පමණි. ඉන් පසු 2019 වසරේ දී චීන ජාතිකයන් 134 දෙනකු යොමු කර තිබූ අතර ඉන් කිසිවකටත් ජපානයේ අවසර හිමි නොවීය.
කෙසේ නමුත් ඉකුත් වසරේ දී එනම් 2020 දී, චීන ජාතිකයන් 77 දෙනකු ජපානයේ සරණාගත තත්ත්වය සඳහා ඉල්ලුම් කර ඇති අතර ඉන් 11 දෙනකුට ජපානයේ සරණාගත තත්ත්වය හිමි වී ඇත.
(රොයිටර්)
