ඉන්දීය අග්‍රාමාත්‍ය නරේන්ද්‍ර මෝදි, දෙදින නිල සංචාරයක් සඳහා මුරුසි දූපත් රාජ්‍යය බලා පැමිණියේය. මුරුසි දූපත් රාජ්‍යය ඔවුන්ගේ 57 වැනි ජාතික දිනය සමරන අතර, ඒ වෙනුවෙන් පැවැත්වෙන රාජ්‍ය උත්සවයේ ප්‍රධාන අමුත්තා වනු ඇත්තේ මෝදිය.

පෝට් ලුවිස් අගනුවර ගුවන්තොටුපොළ වෙත පැමිණි ඉන්දීය අග්‍රාමාත්‍යවරයා, උණුසුම් අයුරින් පිළිගැනීමට මුරුසි අග්‍රාමාත්‍ය නවීන්චන්ද්‍ර රම්ගූලම් කටයුතු කළේය.

මුරුසි අග්‍රාමාත්‍ය නවීන්චන්ද්‍ර රම්ගූලම් ඉන්දීය සම්භවයක් ඇත්තෙකි. මුරුසි දූපත සහ ඉන්දියාව අතරේ යහපත් සබඳතා පවතින අතර, මීට මාස කීපයකට පෙර රම්ගූලම්, නවදිල්ලි අගනුවරදී, ඉන්දීය අග්‍රාමාත්‍ය නරේන්ද්‍ර මෝදි හමුවීමට ගියේය. එහිදී ඉන්දියාවත් මුරුසි දූපතත් අතරේ ද්වීපාර්ශ්වික සබඳතා ශක්තිමත් කර ගැනීමට හැකිවිය.

මුරුසි දූපත් රාජ්‍යයේ 57 වැනි ජාතික දින උළෙලේ ප්‍රධාන අමුත්තා ලෙස ඊට සහභාගී වෙන්නැයි රම්ගූලම්, මෝදිට ඇරැයුම් කළ අතර, මෝදි එම ඇරැයුම පිළිගත්තේය.