ඉන්දියානා ජෝන්ස් තොප්පියට ඉහළ මිලක්
මෙරට නළු නිළියන් බොහෝ දෙනකුගේ රංගනයෙන් හැඩ වුණු 'ඉන්දියානා ජෝන්ස්' දෙවැනි චිත්‍රපටය වන, 'ටෙම්පල් ඔෆ් ඩූම්' චිත්‍රපටය සඳහා ඉන්දියානා ජෝන්ස් පැලඳි තොප්පිය ඇමෙරිකන් ඩොලර් හය ලක්ෂ තිස් දහසක මුදලකට වෙන්දේසි වු බව විදෙස් මාධ්‍ය පවසයි.
ඉන්දියානා ජෝන්ස් චරිතය ලොව ලොකු කුඩා කා අතරේත් ප්‍රසිද්ධය. මෙම චරිතයට පණ පොවන්නේ ජනප්‍රිය මෙන්ම සම්මානනීය නළු හැරිසන් ෆෝඩ්ය.
චිත්‍රපටයේ ඉන්දියානා ජෝන්ස් පැලඳි එම තොප්පිය චිත්‍රපටය සඳහා නිර්මාණය කළේ ලන්ඩන් නුවර හර්බට් ජොන්සන් නමැති සමාගමය. ඒ, හාවුන්ගේ සිනිදු ලොම් යොදා ගනිමින් යැයි ද පැවැසෙයි.
ඉන්දියානා ජෝන්ස් ඇන්ඩ් ද 'ටෙම්පල් ඔෆ් ඩූම්' චිත්‍රපටය තිරගත වූයේ 1984 දීය. එය බොක්ස් ඔෆිස් වාර්තා පිහිටවූ චිත්‍රපටයකි.
චිත්‍රපටයේ ඉන්දීය ගම්මානයක් ගැන කියැවෙයි. එම ගම්මානය සහ ගැමියන් රූගත කෙරුණේ මෙරටදීය. ඩී. ආර්. නානායක්කාර, ධර්මදාස කුරුප්පු, රූබි ද මෙල්, දෙනවක හාමිනේ, අයිරාංගනී සේරසිංහ, දර්ශන පනන්ගල ඇතුළු මෙරට නළු නිළි කැළක් ද මෙම චිත්‍රපටයට එක් වූහ.
