පැයකදී වයිරස ආසාදිතයන් 2,600 ක්
ඇමෙරිකා එක්සත් ජනපදයෙන් සාමාන්‍යයක් ලෙස ගත්විට සෑම පැයකදීම නව කොරෝනා වයිරස ආසාදිතයන් 2,600ක් වාර්තා වන්නේ යැයි රොයිටර්ස් පුවත් සේවය වාර්තා කරයි.
රොයිටර්ස් පුවත් සේවයේ දත්තවලට අනුව ඇමෙරිකාවෙන් වාර්තා වන නව කොරෝනා වයිරස ආසාදිතයන්ගේ ගණන මේ වනවිට මිලියන 4කට ආසන්න වී තිබේ. ලොව වැඩිම ආසාදිතයන් ගණනක් වාර්තා වන රට වන්නේ ද ඇමෙරිකා එක්සත් ජනපදය යි.
ඇමෙරිකා එක්සත් ජනපදයෙන් මුල්වරට ආසාදිතයකු හඳුනාගත්තේ ජනවාරි මස 21 වැනිදා ය. එරටින් ආසාදිතයන් මිලියනයක් වාර්තා වීමට දින 98ක් ගත විය. දෙවැනි මිලියනය වාර්තා වීම සඳහා දින 43ක් ද තෙවැනි මිලියනය වාර්තා වීම සඳහා දින ගණන 27ක් ද ගත වී තිබේ. මිලියන 4 සීමාව, එසේත් නැතිනම් සිවුවැනි මිලයනය සඳහා ගත වී ඇත්තේ දින 16ක් පමණක් යැයි ද දැනට ගණන් බලා ඇත. ඒ අනුව ඇමෙරිකා එක්සත් ජනපදයෙන් සෑම මිනිත්තුවකදීම ආසාදිතයන් 43ක් වාර්තා වී ඇත.
ඇමෙරිකා එක්සත් ජනපදය තුළ වයිරසය පැතිර යෑම පාලනය කිරීම සම්බන්ධයෙන් මධ්‍යම ආණ්ඩුව, ප්‍රාන්ත ආණ්ඩුකාරවරුන් සහ නගරවල නායකයන් හා බලධාරීන් අතර නිරන්තරයෙන් මත ගැටුම් ඇතිවිය. මුඛ ආවරණ, පාසල් විවෘත කිරීම මෙන්ම ව්‍යාපාරික කටයුතු නැවත ආරම්භ කිරීම යන කරුණු සම්බන්ධයෙන් එම විවිධ මට්ටම්වල බලධාරීන් අතරේ මත ගැටුම් ඇතිවිය.
කෙසේ නමුත් මෑතකදී සිට ඇමෙරිකානු ජනාධිපති ඩොනල්ඩ් ට්‍රම්ප් සිය ස්ථාවරය වෙනස් කර ඇත. මුලදී මුඛ ආවරණ පැළැඳීම ප්‍රතික්ෂේප කළ ඇමෙරිකානු ජනාධිපතිවරයා මෑතකදී ප්‍රසිද්ධියේ මුඛ ආවරණ පැළැඳියේ ය.
වසංගතයෙන් වැඩිම බලපෑමක් වී ඇති රටවල් 20, පුද්ගලයන් 10,000ට වාර්තා වන ආසාදිතයන් ගණන, එනම් ඒකපුද්ගල ආසාදිතයන්ගේ ගණන අනුව ඇමෙරිකාවෙන් පුද්ගලයන් දසදහසකට වාර්තා වන ආසාදිතයන්ගේ ගණන 120කි. එහි මුල් ස්ථානයේ පසුවන්නේ චිලී රාජ්‍යයි.
ඇමෙරිකා එක්සත් ජනපදයෙන් වාර්තා වන නව කොරෝනා වයිරස ආසාදිත මරණ ගණන 143,000කි. එය පුද්ගලයන් 10,000කට සියයට 4.4 අනුපාතයකි. ඒක පුද්ගල වයිරස ආසාදිත මරණ ගණන අනුව ඇමෙරිකා එක්සත් ජනපදය පසුවන්නේ හයවැනි ස්ථානයේ ය. වැඩිම නව කොරෝනා වයිරස ආසාදිත මරණ අනුපාතයක් ඇති මුල් රටවල් වන්නේ එක්සත් රාජධානිය, ස්පාඤ්ඤය, ඉතාලිය, චිලී රාජ්‍යය සහ ප්‍රංශය යි.
ගෝලීයව නව වයිරස ආසාදිතයන් වාර්තා වීමේ අඩුවක් දක්නට නැති අතර ඇමෙරිකා එක්සත් ජනපදයෙන් සහ දකුණු අප්‍රිකාවෙන් වාර්තා වන ආසාදිතයන්ගේ ගණන වේගයෙන් වැඩිවෙමින් තිබේ.
බ්‍රසීලයෙන් දිනක් ඇතුළත වාර්තා වී වැඩිම නව කොරෝනා වයිරස ආසාදිතයන්ගේ ගණන බදාදා දිනයේදී වාර්තා වූ අතර ඒ අනුව ලතින් ඇමෙරිකානු කලාපයෙන් වාර්තා වන ආසාදිතයන්ගේ ගණන මිලියන 4 ඉක්මවා ගියේය.
ලොව දෙවැනියට වැඩිම ආසාදිතයන් ගණනක් වාර්තා වන්නේ බ්‍රසීලයෙනි. එරටින් වාර්තා වන ආසාදිතයන්ගේ ගණන මිලියන 2.2 ඉක්මවන අතර වාර්තා වන මරණ ගණන 83,000කි.
ඇමෙරිකා එක්සත් ජනපදය සහ ඉන්දියාවට අමතරව ආසාදිතයන් මිලියනය ඉක්මවා වාර්තා වන අනෙක් රට වන්නේ ඉන්දියාව යි. එරටින් වාර්තා වන වයිරස ආසාදිත මරණ ගණන 40,000කි.
රොයිටර්ස්
