ආකර්ෂණීය පුද්ගලයෙක් වෙන්නේ කොහොමද?
ඔයාට ඔයාගේ ජීවිතයේදී හමුවෙලා ඇති සමහර චරිත, කිසිම හේතුවක් නැතුව දැක්ක ගමන් කැමැත්තක් ඇතිවෙන ප්‍රිය මනාප චරිත. මෙන්න මේ අයට තමයි ආකර්ෂණීය මිනිස්සු කියන්නේ.
ඒ වගේම ඔයාට හමුවෙලා ඇති කිසිම හේතුවක් නැතුව දැක්කත් කේන්ති යන මිනිස්සු, මතක් වෙද්දිත් අපෝ කියවෙන, දැක්කත් දවසම එපාවෙන, කටහඩ ඇහුනත් පිළිකුල් චරිත. අන්න ඒ අය තමයි ආකර්ෂණීය නොවන මින්ස්සු.
ආකර්ෂණය ගිලිහෙන්න ඔයාගේ අතින් වෙන වැරදි ඔයාගේ යාලුවෙක්, බිරිඳ, ගර්ල්ෆ්‍රෙන්ඩ්, කාර්යාලයේ මිතුරු මිතුරියන් නැතිනම් සහෝදර සහෝදරියකට ඔයා අතින් ඔයා නොදැනුවත්ව වෙන වැරදි අඩුපාඩු නිසා ඔයාව එපා වෙන්න පුලුවන්.
ඔයා අනවශ්‍ය විදියට එයාලට කරදර කරනවා නම්, ඕනෑවට වඩා නීති දාලා පාලනය කරන්න හදනවා නම්, ඒ අය අකමැති කුමක් හෝ දෙයක් ඔබ විසින් නිතර නිතර කරනවා නම්, නිතර නිතරම ඔබගෙන් අසන්නට ලැබෙන්නේ දුක් අදෝනා සහ මැසිවිලි නම්, වචන වලට වටිනාකමක් දෙන්නේ නැතිනම් (නිතර නිතරම සමාවගෙන ඒ වැරුද්දම නැවත නැවත කිරීම), කරන්නට බැරි දෙවල් ගැන බොරු පොරොන්දු දෙනවා නම්, නිතර නිතර එකම දේ කියවමින් අනිත් අයට කරදරයක් වෙනවා නම්, අනිත් මින්ස්සුන්ගේ හැසිරීම්වලින් ඔයාට ඒ අය තෙරුම් ගන්න බැරි නම්, අනිත් අයට උදව් කරලා අනෙක් අතට ඒ උදව් තමන්ටත් කරයි කියලා බාපොරොත්තු වෙනවා නම්, තැන් තැන්වල අනුන්ගේ වැරදි අඩුපාඩු කියව කියව යනවා නම්, නිතරම අනිත් අයගේ ඕපාදූප හොයනවා නම්, තමන්ට අකමැති බව දැන දැන දිගින් දිගටම පස්සෙන් යනවා නම්, තමන්ගේ ගෞරවය තමන් විසින්ම නැතිකරගන්නවා නම්, ප්‍රශ්නයකදී ඕනෑවට වඩා ඒ ගැන සිතමින් නොසන්සුන්ව හැසිරෙනවා නම්, කට ඇරියොත් කියන්නෙම බොරු නම් මෙන්න මේ වගේ අයට කවුරුත් කැමති නෑ.
මේ වගේ හැසිරීම් නිසා නොදැනුවත්වම අනෙක් අයට ඔයාව පිළිකුල් චරිතයක් වෙන්න පුළුවන්.
ආක්ෂණීය වෙන්න නම්, අනිත් අයට කරදරයක් නොවී පාඩුවේ ඉන්න මිනිස්සුන්ට අපි හැමෝම කැමති. අනිත් අය අකමැති දේවල් නොකර, ඒ අය අකමැති දෙවල් කරන්න බල නොකර, අනුන්ගේ ඕපා දූප හොයන්නේ නැති, වාචාලකමට කියවන්නේ නැතුව දුරදිග හිතලා කටයුතු කරනවා නම්, අනිත් මිනිස්සුන්ව තේරුම් අරගෙන කටයුතු කරනවා නම්, යටි අරමුණු නැතිව අනිත් අයට උපකාර කරන, කනස්සලු දුක් අදෝනා නැතිව නිතර සිනාමුසුව සියලු දෙනා එක්ක සමගියෙන් වැඩ කටයුතු කරනවා නම්, කෙනෙක් ඔයාට අකමැති කියලා දැනුනම පස්සෙන් නොයා තමන්ගේ ගෞරවයත් රැකගෙන තමන්ගේ පාඩුවේ අනිත් අයට කරදර නොකර, යටි අරමුණු නිසා අනිත් අයට බොරු කියන්නේ නැතිව, ප්‍රශ්නෙකදී නුවණක්කාර ලෙස බොරුවට කලබල නොවී තැනට සුදුසු ලෙස හැසිරෙනවානම්, තමන්ගේ ගෞරවය ආරක්ෂා වෙන විදිහට වැඩ කටයුතු කරනවා නම්, ඔයා නොදැනුවත්වම අනෙක් අයට ආකර්ෂණීය වෙනවා.
ඔයා අතිනුත් නොදැනුවත්වම මේ වැරදි වෙනවා නම් මේ මොහොතේ ඉදන්ම මේ දේවල් හරිගස්ස ගන්න පුළුවන්. ඕනෑම පුද්ගලයෙකුට වැරදි අඩුපාඩු තියෙන්න පුළුවන් නමුත් ජීවිතයේ තමන්ට අත්දකින්න වෙන සිද්ධිවලින් පාඩම් පාඩම් ඉගෙනගෙන නැවත නැවත එකම වැරැද්ද නොකර තමන්ගේ වැරදි අඩුපාඩු හදා ගන්නවා නම් දවසක අපි හැමෝටම ප්‍රියමනාප ආකර්ෂණීය පුද්ගලයෙක් වෙන්න පුළුවන්.
ලියන්නේ - ජයනි සිතාරි
