ශුක්‍රාණු බැංකුව
බොරැල්ල, කාසල් වීදිය කාන්තා රෝහලේ අධ්‍යක්ෂ අජිත් දන්තනාරායන
අපේ රටේ ප්‍රජනන සෞඛ්‍යය සේවාවෙහි ඉදිරි පියවරක් තබමින් පසුගියදා කොළඹ කාසල් වීදියේ කාන්තා රෝහල කාන්තාවන් සඳහා වන පළමු වැනි ශුක්‍රාණු ධාතු බැංකුව ස්ථාපිත කෙරිණි. ශුක්‍රාණු බැංකුවක් යනු කෘතිම සිංචනය හෝ අභ්‍යන්තර ගැබ් ගැනීම වැනි සරුභාවයට ප්‍රතිකාර කිරීම සඳහා පරිත්‍යාග කරන ලද ශුක්‍රාණු ධාතු එකතු කිරීම , ගබඩා කිරීම සහ සැපැයීම සඳහා වන පහසුකමකි. මෙය සරුභාවය පිළිබඳ අභියෝගවලට මුහුණ දුන් යුවළ සඳහා නව බලාපොරොත්තුවක් ලබා දේ. මෙහි සේවාව ලබා ගත හැක්කේ කෙසේද, මෙහි සේවාව ලබා ගත හැකි අය කවුද යන්න වැඩි විස්තර පහත ලිපියේ දැක්වේ.
රෝහලක් තුළ පළමුවරට ශුක්‍රාණු ධාතු බැංකුවක් ආරම්භ කිරීම රෝහල් ඉතිහාසයේ නව සංදිස්ථානයකි. බොහෝ කලකට පෙරාතුව සිටම මඳ සරු යුවළ සඳහා කාසල් රෝහලේදී සායන දෛනිකව පවත්වා ඇත. මෙකී සායනවලදී මුහුණ දුන් ප්‍රධානතම ප්‍රශ්නය වන්නේ මඳ සරුභාවයට සියයට 50ක් මවත් ඉතුරු සියයට 50 පුරුෂයාත් දැරිය යුතු වුවත් සායන සඳහා ඉදිරිපත් වන්නේ මව පමණකි. එනිසාම අදාල මාතෘකාවේදී කාගෙත් වැඩිපුර ඇස් යොමුවූයේ කාන්තාව දෙසටය. බොහෝ විට පිරිමි පාර්ශ්වය මෙවැනි සායන මඟ හැරීම සුලබව සිදු වුවත් සියයට 50ක් ඔවුන්ගේද දායකත්වය ලැබිය යුතු වේ. මෙවැනි ශුක්‍රාණු ධාතු බැංකුවක් මගින් පියාගේ පැත්ත ගැන විමසීමක් සිදු කෙරේ.
දරුවන් අපේක්ෂිත යුවළ පරීක්ෂණ සඳහා පැමිණි විට මවගේ පරීක්ෂණවලට අමතරව පියා උදෙසාද යම් පරීක්ෂණ ඊට සමගාමීව සිදු කෙරේ. පියවරුන්ගේ පරීක්ෂණයේදී විශේෂයෙන්ම ශුක්‍රාණු ධාතු පරීක්ෂාවට ලක් කෙරේ. ඒ අනුව අවශ්‍ය ප්‍රමාණයට ශුක්‍රාණු ධාතු තිබේද, ඒවා සජීවී ශුක්‍රාණුද, මෙමගින් දරුපල ලැබිය හැකිද නැද්ද යන වග සොයා බැලේ. මෙවන් පරීක්ෂණවලින් හෙළිවන පරිදි බොහොමයක් පියවරුන්ගේ ශුක්‍රාණු ධාතු දරුපල ලැබීමට තරම් ප්‍රමාණවත් නොවේ.
සාමාන්‍යයෙන් දරුවකු පිළිසිඳ ගැනීම සඳහා ශුක්‍රාණු ධාතු සියයට 70ක් පමණ අවැසි වුවද බොහොමයක් පුරුෂ පාර්ශ්වයේ එය සියයට 20ක් පමණ පහළ ප්‍රතිශතයකින් යුත් බව හෙළිවී ඇත.
මවගේ පරීක්ෂණවලදී ඇය නිරෝගී ක්නාතාවක් නම් ඩිම්බ සම්බන්ධ ගැටලුවක් නැත්නම් පියාගේ නම් මඳසරු භාවය ඇත්තේ, ඔහු සායනවලට ඉදිරිපත් වීම මඟ හරී නම් මෙවැනි අවස්ථාවකදී ශුක්‍රාණු ධාතු බැංකුවේ සේවය මවට ලබා ගත හැකිය. මෙහිදී පරිත්‍යාගශීලීන්ගේ පෞද්ගලිකත්වය සහ ලබන්නාගේ රහස්‍යභාවය යන කරුණු දෙකම මුළුමනින්ම ආරක්ෂා වන පරිදි මෙහි කටයුතු ක්‍රියාවට නැංවේ.
ශූක්‍රාණු ලබා ගැනීමේ කාර්යයේදී වුවත් ආරක්ෂාව සහ ගුණාත්මක භාවය සහතික කරනු වස් පරිත්‍යාගශීලීන්ට වෛද්‍ය පරීක්ෂණ කිහිපයකටම මුහුණ දීමට සිදු වේ. ඔවුන් අවුරුදු 40ට අඩු විය යුතුය. මූලික වශයෙන්ම ඔවුන්ගේ සෞඛ්‍ය තත්වය, දියවැඩියාව, ක්ෂය රෝගය ,අධි රුධිර පීඩනය , එච්.අයි.වී ,හෙපටයිටීස්,ලිංගාශ්‍රිත රෝග තිබේද යන්න පරීක්ෂා කෙරේ. ඊට අමතරව රුධිර වර්ගය, රුධිර කාණ්ඩය සමග සැසැඳේඳ, ලේ ප්‍රමාණවත් පරිදි තිබේද යන්න පරීක්ෂණ ඇරැඹේ. මෙකී පරීක්ෂණවලට පසු ඔහු මෙම කාර්යය සඳහා සුදුසු බවට නිගමනය වූදා සිට තවත් මාස 03කින් අනතුරු නැවතත් පරීක්ෂණ කටයුතු සිදු කෙරේ. එයිනුත් ඔහු නිරෝගී පුද්ගලයකු බව ඔප්පු වුවහොත් ඔහුගෙන් ශුක්‍රාණු ධාතු ලබා ගනී. පැය භාගයක් ඇතුළත ශුක්‍රාණු ධාතු ලබා ගෙන රෝහල් රසායනාගාරයේ අධි ශීතකරණ ක්‍රියාවලියට ලක් කොට තැම්පත් කරනු ලැබේ. ගබඩා විධි විධානවලට අනුව අවම වශයෙන් ෆැරන්හයිඩ් අංශක 200ක පමණ උෂ්ණත්වයකට එය ගබඩා කෙරේ. නිසි උෂ්ණත්වය කළමණාකරණය කර ගතහොත් ඕනෑම කාලයක් තබා ගත හැකිය.
ඒ අනුව මඳ සරු යුවළවලදී මව නිරෝගී නමුත් පියාගේ මඳ සරු ප්‍රශ්න ඇත්නම් නිසි උෂ්ණත්වයකට ගබඩා කළ ශුක්‍රාණු ධාතු රැගෙන ඒවා සාමාන්‍ය උෂ්ණත්වයට පත්කර iui පරීක්ෂණයට අනුව මවගේ තැම්පත් කිරීම සිදු වේ. ශුක්‍රාණු මවගේ ගර්භාෂයේ තැම්පත් කිරීමෙන් පසු සති 06ක් ගතවන තුරු මව විටින් විට ස්කෑන් ,ලේ ,මුත්‍ර පරීක්ෂණවලට භාජන කෙරේ. එවිට ඇය නිවැරැදිව ගැබ් ගෙන ඇද්ද යන්න තහවුරු කර ගැනේ. එය නිශ්චිත කර ගත් පසු ඇයට සාමාන්‍ය ගැබිණි මවක් පරිද්දෙන් රෝහල් සායනවලට සහභාගී වීමට අවකාස සැලසේ. මෙම සේවාව ලබා ගෙන සාර්ථක වූ මවුවරු මේ වනවිට හය දෙනකු පමණ සිටින අතර ශුක්‍රාණු ධාතු ලබා දුන් පරිත්‍යාගශිලීන් මේ වනවිට 30කට ආසන්නව සිටී.
වයස අවුරුදු 35න් පසු කාන්තාවකගේ සාපල්‍යතාව යනු යම් අවදානමකි. මන්ද මේ වයසේදී අධි රුධිර පීඩනය, දියවැඩියාව, කොලෙස්ට්‍රෝල් වැනි බෝ නොවන රෝගවලට ගොදුරු වීමේ අවකාස වැඩි නිසාය. එබැවින් අවුරුදු 40ක මවක් මේ සඳහා අපගෙන් යම් ඉල්ලීමක් කරනවා නම් මෙවන් ආකාරයේ තැම්පත් කිරීමක් සිදු කර ගත හැකිය.
කොවිඩ්වලින් පසු බොහෝ සෙයින්ම දරු උපත් අඩු වූ , සීමා වූ කාලයකි. ඊට මඳසරු භාවය වැනි කරුණුද හේතු වී ඇත. එවන් මවුපියවරු උදෙසා දරුවකු ගැන බලාපොරොත්තුවක් ඇති කිරීම මෙම සේවාවේ ප්‍රධානම අරමුණය. අප ගෙන යන මෙම සේවාව සඳහා පුරුෂ පක්ෂයටත් දායක වීමට පුළුවන. ඒ අනුව, 0112672216 සහ 01122672217 යන දුරකතන අංක අමතා දිනයක් සහ වේලාවක් වෙන් කරවා ගෙන එදිනට පැමිණ ඔබට මේ සඳහා ලියාපදිංචි වීමට පුළුවන.
සටහන - මාධවී ධර්මරත්න
