භින්නෝන්මාදය
විකාර හිතෙන, විකාර පෙනෙන, විකාර ඇසෙන, භින්නෝන්මාදය
භින්නෝන්මාදය යනු පුද්ගලයෙකු සිතන, දැනෙන සහ හැසිරෙන ආකාරය කෙරෙහි බලපාන දරුණු මානසික සෞඛ්‍ය තත්වයකි. භින්නෝන්මාදය ඇති පුද්ගලයින් තුල මායාවන් නැතහොත් සැබෑ නොවන දේවල් දැකීම හෝ ඇසීම, මිත්‍යාමත විශ්වාස කිරීම (ව්‍යාජ විශ්වාසයන් තබා ගැනීම) සහ විකාරරූපී ආකල්ප සහ විකාර ලෙස හැසිරීම දැකිය හැකිය. මෙම රෝග ලක්ෂණ මිනිසුන්ට යථාර්ථය සමඟ ඇති සම්බන්ධතා නැති කර ගැනීමට හේතු විය හැකි අතර, එදිනෙදා ක්‍රියාකාරකම් කළමනාකරණය කිරීම අභියෝගාත්මක කරයි.
භින්නෝන්මාදය සඳහා ප්‍රතිකාර
භින්නෝන්මාදය සඳහා ජීවිත කාලය පුරාම ප්‍රතිකාර අවශ්‍ය වන අතර, එයට සාමාන්‍යයෙන් ඖෂධ ලබා ගැනීම , චිකිත්සාව සහ එදිනෙදා කාර්යයන් කළමනාකරණය කිරීම වැනි දෑ අනුගමනය කල යුතුය. මෙම තත්ත්වය ඇති පුද්ගලයින්ට තෘප්තිමත් ජීවිතයක් ගත කිරීමට උපකාර කිරීම සඳහා නිරන්තර සැලකිල්ල අත්‍යවශ්‍ය වේ.
ප්‍රතිකාර නොකලොත්...
භින්නෝන්මාදයෙන් පෙළෙන බොහෝ දෙනෙකුට මෙම තත්ත්වය ඇති බව නොතේරෙන අතර ඔවුන්ට ප්‍රතිකාර අවශ්‍ය බව විශ්වාස නොකරයි. ප්‍රතිකාර නොකළ භින්නෝන්මාදයෙන් පෙළෙන්නන් හට වඩාත් දරුණු රෝග ලක්ෂණ, රෝහල් ගතවීම් වැඩි වීම, තේරුම් ගැනීමේ හැකියාවන් අඩුවීම සහ දුර්වල සමාජ ප්‍රතිඵල ඇති කළ හැකි බව පර්යේෂණවලින් පෙන්වා දී ඇත. ප්‍රතිකාර නොකළ මනෝ ව්‍යාධියෙන් පෙළෙන පුද්ගලයින්ට තුවාල ඇතිකර ගැනීම සහ සියදිවි නසාගැනීමේ අවදානම ද වැඩිය.
රෝග උත්සන්න වීමට පෙර ප්‍රතිකාර කිරීමෙන් ලැබෙන ප්‍රතිලාභ
මුල් කාලයේදී රෝගය හඳුනාගෙන ප්‍රතිකාර කිරීම මඟින් භින්නෝන්මාදයෙන් පෙළෙන අයගේ දිගුකාලීන දෘෂ්ටිය සැලකිය යුතු ලෙස වැඩිදියුණු වේ. රෝග ලක්ෂණ කලින් හඳුනාගෙන කළමනාකරණය කිරීමෙන්, පුද්ගලයන්ට වඩා හොඳ ප්‍රතිඵල අත්විඳීමට ඇති ඉඩකඩ වැඩිය, එයට තේරුම් ගැනීමේ හැකියාවන් වැඩි දියුණු කිරීම සහ රෝග ලක්ෂණ වල බරපතලකම අඩු කිරීම ඇතුළත් වේ.
භින්නෝන්මාදයේ රෝග ලක්ෂණ
භින්නෝන්මාදය පුද්ගලයෙකු සිතන, දැනෙන සහ හැසිරෙන ආකාරය කෙරෙහි බලපාන අතර එයට ඇති රෝග ලක්ෂණ මෙසේයි. මෙම රෝග ලක්ෂණ පුද්ගලයාගෙන් පුද්ගලයාට වෙනස් විය හැකි නමුත් සාමාන්‍යයෙන් පහත සඳහන් ලක්ෂණ ඇතුළත් වේ:
1. මායා
- මේවා ප්‍රතිවිරුද්ධ සාක්ෂි තිබියදීත් යමෙකු දැඩි ලෙස දරන ව්‍යාජ විශ්වාසයන් වේ. උදාහරණයක් ලෙස:
- සත්‍ය නොවන විට පවා තමන්ට හානියක් සිදුවන බව හෝ තමා දෙස කවුරුන් හෝ බලා සිටින බව විශ්වාස කිරීම.
- තමන් ප්‍රසිද්ධ හෝ විශේෂ හැකියාවන් ඇති බව සිතීම. තමන්ට ලෙඩ සුවකිරීමේ හැකියාවන් ඇති බව හෝ තමන් රහත් වී ඇති යැයි සිතීම.
- ව්‍යසනයක් සිදු නොවන විට විශාල ව්‍යසනයක් සිදුවීමට ආසන්න බව දැනීම.
- භින්නෝන්මාදයෙන් පෙළෙන පුද්ගලයින් අතර මායාවන් බහුලව දක්නට ලැබේ.
2. අන් අයට නොපෙනෙන නොඇසෙන දේ පෙනීම සහ ඇසීම :
- මායාවන් යනු සැබෑ නොවන දේවල් වටහා ගැනීම, එනම් කටහඬ ඇසීම හෝ අන් අය නොදකින දේවල් දැකීම ය. දෙවියන් දැකීම, යකුන් දැකීම.
- කටහඬවල් ඇසීම භින්නෝන්මාදයේ බහුලව දක්නට ලැබෙන මායාවන් වර්ගයක් වන අතර එය අනෙකුත් ඉන්ද්‍රියන්ට ද බලපායි.
3. විකාර දෙඩවීම සහ විකාර සිතීම
- මෙය පැහැදිලිව සන්නිවේදනය කිරීමේ අපහසුතාවයට හේතු වේ. භින්නෝන්මාදය ඇති පුද්ගලයින්ට:
- තේරුමක් නැති හෝ අසන ලද ප්‍රශ්නයට අදාළ නොවන පිළිතුරු ලබා දිය හැකිය.
- අසම්පූර්ණ පිළිතුරු ලබා දෙයි.
- සමහර විට, ඔවුන් වචන පටලමින් උච්ඡාරණය කරයි.
4. අතිශයින්ම අසාමාන්‍ය ලෙස හැසිරීම:
- මෙම හැසිරීම ළමා හෝ මෝඩ ලෙස හැසිරීමේ සිට හේතුවක් නොමැතිව කලබල වීම දක්වා විහිදේ.
- භින්නෝන්මාදය ඇති පුද්ගලයින්ට ඔවුන්ගේ හැසිරීම කෙරෙහි අවධානය යොමු කර නොමැති නිසා කාර්යයන් සම්පූර්ණ කිරීමේදී ගැටළු ඇති විය හැකිය.
- ඔවුන් සමාජ සම්මතයට නොගැලපෙන ලෙස අසාමාන්‍ය හෝ නුසුදුසු ලෙස ක්‍රියා කළ හැකිය, නැතහොත් කිසිසේත් ප්‍රතිචාර නොදක්වයි.
5. සෘණාත්මක රෝග ලක්ෂණ:
- මේවා දෛනික ජීවිතයේ සාමාන්‍යයෙන් ක්‍රියා කිරීමේ හැකියාව අඩුවීමක් ගැන සඳහන් කරයි. භින්නෝන්මාදය ඇති පුද්ගලයින්ට:
- පුද්ගලික සනීපාරක්ෂාව ගැන සැලකිලිමත් වීම නැවැත්වීම (උදා: ස්නානය නොකිරීම, දත් නොමැදීම, කිලුටු ඇඳුම් ඇඳීම).
- හැඟීම් පෙන්වීමෙන් වැළකීම.
- ඒකාකාරී හඬකින් කතාකිරීම.
-පෙර දී ඔවුන් ආශාවෙන් කල දේවල් වලින් ඈත් වීම.
- සමාජයෙන් ඈත් වී ජීවත්වීම.
මෙම රෝග ලක්ෂණ සහිත පුද්ගලයෙකුට අන් අය සමඟ ගනු දෙනු කිරීමට සහ දෛනික වැඩකටයුතු කිරීමට ඇති හැකියාව අඩු වී යයි.
ලියන්නේ - ජයනි සිතාරි අල්විස්
