සාධාරණ ලෙස ක්‍රියා කිරීම ඉතා වැදගත්
රට මුහුණ දී තිබෙන ආර්ථික අර්බුදයෙන් ගොඩ ඒම සඳහා ආර්ථිකයේ සියලුම පාර්ශවකරුවන් “සාධාරණ ලෙස ක්‍රියා කිරීම” ඉතා වැදගත් යැයි ශ්‍රී ලංකා මහ බැංකුව නිවේදනයක් නිකුත් කරමින් සඳහන් කරයි.
රජය සහ මහ බැංකුව මහජනතාව මත පවතින ආර්ථික දුෂ්කරතා අඩු කිරීම සඳහා විවිධ ක්‍රියාමාර්ග ගනිමින් සිටින බව ද එම නිවේදනයේ දැක්වේ.
වත්මන් අර්බුදයට සහ එහි ප්‍රතිඵලයක් ලෙස පවතින දුෂ්කරතාවලට දායක වන එක් ප්‍රධාන සාධකයක් වනුයේ බැංකු පද්ධතිය තුළ විදේශ විනිමය ද්‍රවශීලතාව නොමැතිකම බවත් විදේශ විනිමය ද්‍රවශීලතාවයේ හිඟය ඉන්ධන ඇතුළු අත්‍යවශ්‍ය ආනයන සැපයීමට බලපා ඇති බවත් එම නිවේදනයේ සඳහන් යි.
බැංකු පද්ධතිය තුළ ප්‍රමාණවත් විදේශ විනිමය ද්‍රවශීලතාවයක් සහතික කිරීම සඳහා, අපනයන ඉපැයීම් රුපියල්වලට පරිවර්තනය කිරීමේ අවශ්‍යතා පැනවීමට මහ බැංකුවට සිදු වූ බව ද එම නිවේදනයේ සඳහන් ය.
විදේශ විනිමය පිටතට ගලායාම අධෛර්යමත් කිරීම සඳහා රජය සහ මහ බැංකුව විසින් ඇතැම් ආනයන හා ගෙවීම් ක්‍රම මත සීමා පැනවීම සහ ආන්තික අවශ්‍යතා හඳුන්වාදීම් මෙන්ම, අවිධිමත් විදේශ විනිමය වෙළඳපොළ හරහා ගමන් නොකර විධිමත් බැංකු පද්ධතිය වෙත විදේශ විනිමය ගලා ඒම දිරිමත් කිරීම වැනි ක්‍රියාමාර්ග ගෙන ඇති බව ද එම නිවේදනයේ දැක්වේ.
මෙම නියාමන ක්‍රියාමාර්ගවල සාර්ථකත්වය සහ අපේක්ෂිත ප්‍රතිඵල ලබා ගැනීමේ හැකියාව රඳා පවතින්නේ වෙළඳ ප්‍රජාවේ සහ බැංකු පද්ධතියෙන් ලැබෙන සහයෝගය සහ සහයෝගීතාවය මත බවත් කෙසේ වෙතත්, ඇතැම් වෙළඳපොළ පාර්ශවකරුවන් මෙම රෙගුලාසිවලට සම්පුර්ණයෙන්ම අනුකූල නොවන ලෙස කටයුතු කරමින් සිටින බව ශ්‍රී ලංකා මහ බැංකුවේ අවධානයට ලක්ව ඇති බවත් එම නිවේදනයේ සඳහන් ය.
එවැනි ක්‍රියා අඛණ්ඩව කරගෙන ගියහොත්, දුෂ්කර හා අසාමාන්‍ය තත්ත්ව යටතේ සියලුම පාර්ශ්වකරුවන්ගෙන් බලාපොරොත්තු වන ‘සමසේ විඳ දරා ගැනීමේ’ සදාචාරාත්මක වගකීම යටපත් කරන අතරම, දුෂ්කර කාලවලදී රජයෙන් අපේක්ෂා කරන සහයෝගය ජනතාවට අහිමි වනු ඇති බවත් ශ්‍රී ලංකා මහ බැංකුව තවදුරටත් සිය නිවේදනයේ සඳහන් කර ඇත.
මෙවැනි පසුබිමක් තුළ, ජාතියේ යහපත උදෙසා සියලු රෙගුලාසිවලට අනුකූල වීම දැඩි ලෙස නිරීක්ෂණය කිරීමට හැකි වන පරිදි ගත හැකි සෑම පියවරක්ම ඉදිරියේදීත් ගන්නා බව ආර්ථිකයේ සියලුම පාර්ශ්වකරුවන්හට නැවත අවධාරණය කිරීමට මහ බැංකුව අපේක්ෂා කරන බවත් එම නිවේදනයේ දැක්වේ.
රෙගුලාසි වලට අනුකුල නොවන ක්‍රියාවක් හඳුනාගනු ලැබුවහොත්, අදාළ නීතිමය විධිවිධාන තුළ දැඩි ක්‍රියාමාර්ග ගනුලැබෙනු ඇති බවත් ශ්‍රී ලංකා මහ බැංකුව නිකුත් කළ එම නිවේදනයේ දැක්වේ.
ශ්‍රී ලංකා මහ බැංකුව නිකුත් කළ නිවේදනයේ මෙසේ ද දැක්වේ.
“අපනයන ආදායම් අධීක්ෂණ පද්ධතිය (EPMS) සහ සමස්ත දේශසීමා අතර ගනුදෙනු සහ දේශීය විදේශ මුදල් ගනුදෙනු අධීක්ෂණ පද්ධතියක් වන ජාත්‍යන්තර ගනුදෙනු වාර්තාකරණ පද්ධතිය (ITRS) හරහා විදේශ විනිමය ගනුදෙනු අධීක්ෂණය කිරීමේ හැකියාව මහ බැංකුව විසින් සවිමත් කර තිබීම ද සුවිශේෂී කරුණකි. මෙම පද්ධති මඟින් විදේශ විනිමය ගලා ඒම සහ පිටතට ගලායාම පිළිබඳ නිරන්තර අධීක්ෂණය සඳහා පහසුකම් සලසයි. තවද, යම් අක්‍රමිකතා හඳුනා ගැනීමට විගණන ආයතන වැනි ස්වාධීන වෘත්තීයමය ආයතනවල සහාය ද ලබා ගැනේ.
එබැවින්, දැනට පවතින රෙගුලාසිවලට අනුකූලව කටයුතු කරන ලෙස බලපත්‍රලාභී බැංකු සහ වෙළඳ ප්‍රජාව වෙතින් ඉල්ලා සිටින අතර, අතිශය අභියෝගාත්මක තත්ත්ව යටතේ ආර්ථිකයේ සියලුම පාර්ශවකරුවන්ට අවශ්‍ය සහාය ලබාදීමට රජය සහ මහ බැංකුව දරන ප්‍රයන්තවලට දායක වන ලෙසද ඉල්ලා සිටී. නියමිත කාල සීමාව තුළ සියලුම අපනයන ආදායම නැවත මෙරටට ගෙන්වා ගැනීමටත් රෙගුලාසිවලට අනුකූලව ඉතිරි ඉපැයීම් බැංකු පද්ධතිය හරහා රුපියල්වලට පරිවර්තනය කරන ලෙසත් අපනයන වෙළඳ ප්‍රජාවට නියම කර ඇත. විදේශ විනිමය ගනුදෙනු සම්බන්ධයෙන් වන සියලුම රෙගුලාසි දැඩි ලෙස පිළිපැදීම සහතික කරන ලෙස බැංකු ප්‍රජාවගෙන් ඉල්ලා සිටී.
රජය සහ මහ බැංකුව නුදුරු කාලීනව ආර්ථික පීඩන සමනය කිරීමට අවශ්‍ය විදේශීය මූල්‍ය සුරක්ෂිත කිරීම සඳහා අඛණ්ඩ උත්සාහයන් ගනිමින් සිටී. ආර්ථික ගැලපුම් වැඩසටහනක් සඳහා ජාත්‍යන්තර මූල්‍ය අරමුදල සමඟ කෙරෙන සාකච්ඡාවල කැපී පෙනෙන ප්‍රගතියක් දක්නට ඇත. නීති සහ මූල්‍ය උපදේශකයන්ගේ සහාය ඇතිව ණය ප්‍රතිව්‍යුහගත කිරීමේ ක්‍රියාවලිය ක්‍රියාත්මක වෙමින් පවතී. ආර්ථිකයේ දිගුකාලීන ව්‍යුහාත්මක ගැටලු මඟහරවා ගැනීම සඳහා අවශ්‍ය ප්‍රතිසංස්කරණ ක්‍රියාත්මක කිරීමට රජය සහ මහ බැංකුව කැපවී සිටී.
වත්මන් ආර්ථික දුෂ්කරතා සහ පීඩා ජය ගැනීම සඳහා සියලුම පාර්ශ්වකරුවන්ගෙන් සැලකිය යුතු සහ සාමූහික උත්සාහයක් අවශ්‍ය බව මහ බැංකුව නැවත අවධාරණය කරයි. ඕනෑම පාර්ශ්වකරුවන් කණ්ඩායමක වැරැදි ක්‍රියා නිසා ආර්ථික අර්බුදය උග්‍රවීම නොවැළැක්විය හැකි අතර එමඟින් පුළුල්ව පැතිරුණු අහිතකර බලපෑම් ඇති කරනු ඇත. ජාතිය ඉක්මනින් යථා තත්ත්වයට පත් වීමට සහ මෙම අර්බුදයෙන් ශක්තිමත්ව නැගී සිටීම සඳහා හෘද සාක්ෂියට එකඟව වගකීමෙන් යුතුව කටයුතු කිරීමත්, මෙම අවශ්‍ය මොහොතේදී නොපිරිහෙලා සහාය දැක්වීමත් සැමගේ යුතුකමයි.”
