පශ්චාත් කොවිඩ් - අභියෝග ජය ගැනීම
“පශ්චාත් කොවිඩ් - නව ආර්ථිකයේදී, මූල්‍ය කළමනාකරණය, බැංකු අරමුදල් ලබාගැනීම සහ ව්‍යවසායක නායකත්ව ක්ෂේත්‍රවලදී දී කුඩා සහ මධ්‍යම පරිමාණ ව්‍යවසායකයන් මුහුණපාන අභියෝග ජයගැනීම සඳහා විසඳුම්” යන මාතෘකාව යටතේ විශේෂ සම්මන්ත්‍රණයක් අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් හම්බන්තොට මාගම් රුහුණුපුර ජාත්‍යන්තර සම්මන්ත්‍රණ ශාලාවේදී අනිද්දා (20) පෙරවරු 8.30 සිට පස්වරු 2.00 දක්වා පැවැත්වේ.
ශ්‍රී ලංකා සහතිකලත් කළමනාකරණ ගණකාධිකාරී ආයතනයේ (සී.එම්.ඒ. ශ්‍රී ලංකා) “සී.එම්.ඒ. ශ්‍රී ලංකා කොවිඩ්-19 කුඩා සහ මධ්‍යම පරිමාණ ව්‍යවසාය සංවර්ධන කමිටුව” මෙම සම්මන්ත්‍රණය සංවිධානය කරයි.
සම්මන්ත්‍රණයේ ආරම්භක උත්සවය පෙරවරු 8.30 සිට පස්වරු 10.30 දක්වා පැවැත්වෙන අතර අග්‍රාමාත්‍ය මහින්ද රාජපක්ෂ මහතා එම උත්සවයේ ප්‍රධාන ආරාධිත අමුත්තා ලෙස සහභාගී වේ.
හම්බන්තොට දිස්ත්‍රික්කය තුළ ක්‍රියාත්මක වාණිජ බැංකුවල ගනුදෙනුකරුවන් ආකර්ෂණය කරගැනීම මෙම සම්මන්ත්‍රණයේ එක් අරමුණකි. මෙම සම්මන්ත්‍රණය සඳහා කුඩා සහ මධ්‍යම පරිමාණ ව්‍යවසාය 300ක් පමණ සහභාගී වනු ඇතැයි සංවිධායක මණ්ඩලය අපේක්ෂා කරයි.
මූල්‍ය කළමනාකරණය, බැංකු අරමුදල් ලබාගැනීම, ව්‍යවසාය කළමනාකරණ නායකත්වය, කම්කරු, සහ අලෙවිකරණ යන මාතෘකා යටතේ ප්‍රධාන පෙළේ කථිකයන් මෙහිදි දේශන පවත්වන බවත් එම කටයුතු සමඟ එක්ව ඒ ඒ ක්ෂේත්‍රවල විශේෂඥයන් සමඟ විශේෂ සාකච්ඡාවාර ද පැවැත්වෙන සංවිධායක මණ්ඩලය සඳහන් කරයි.
දේශීය මෙන් ම විදේශීය යන අංශ දෙකෙහි ම කුඩා සහ මධ්‍යම පරිමාණ ව්‍යවසාය අංශ වර්ධනය කිරීම සඳහා “සී.එම්.ඒ. ශ්‍රී ලංකා කොවිඩ්-19 කුඩා සහ මධ්‍යම පරිමාණ ව්‍යවසාය සංවර්ධන කමිටුව” බදුකරණය සහ දිරිගැන්වීම් පිළිබඳ යෝජනා මාලාවක් ද සකස් කර ඇති අතර මෙම සම්මන්ත්‍රණයේදී එම යෝජනා මාලාව ද ඉදිරිපත් කිරීමට නියමිත ය.
වාරිමාර්ග අමාත්‍ය චමල් රාජපක්ෂ, පරිසර අමාත්‍ය මහින්ද අමරවීර, කර්මාන්ත අමාත්‍ය විමල් විරවංශ, ක්‍රීඩා සහ යෞවන කටයුතු අමාත්‍ය නාමල් රාජපක්ෂ, මුදල් සහ ප්‍රාග්ධන වෙළඳපොල සහ රාජ්‍ය ව්‍යවසාය ප්‍රතිසංස්කරණ රාජ්‍ය අමාත්‍ය අජිත් නිවාර්ඩ් කබ්රාල්, සහ ගුවන් සේවා සහ අපනයන කලාප සංවර්ධන රාජ්‍ය අමාත්‍ය ඩී. වී. චානක මහත්වරුන් ද මෙම සම්මන්ත්‍රණයට සහභාගී වීමට නියමිත ය.
ආසන්නයේ පිහිටි බැංකු ශාඛාව හෝ හම්බන්තොට දිස්ත්‍රික් වාණිජ මණ්ඩලය සම්බන්ධ කරගැනීමෙන් මෙම සම්මන්ත්‍රණය සඳහා ලියාපදිංචි විය හැකි යැයි සංවිධායක මණ්ඩලය දැනුම් දෙයි.
සම්මන්ත්‍රණය පිළිබඳ වැඩි විස්තර 0775139117, 047 493 3933, 077 629 2492 යන දුරකතන අංකවලින් ද [email protected] සහ [email protected] විද්‍යුත් ලිපින (ඊමේල්) වලින් ද ලබාගත හැකි යැයි ද සංවිධායක මණ්ඩලය වැඩිදුරටත් සඳහන් කරයි.
