13 දෙනා යහතින් ඉන්නවා
තායිලන්තයේ භූ ගත ලෙන තුළ දින නවයක් තිස්සේ සිරවී සිටින පා පන්දු කණ්ඩායමේ දරුවන් 12 දෙනා සහ ඔවුන්ගේ පුහුණුකරු යහතින් සිටින බව තහවුරු වී ඇත.
මේ බව තහවුරු කර ගැනිමට හැකි වූයේ ජලයෙන් පිරි ගිය ලෙන් පද්ධතියේ එම කණ්ඩායම සොයා මෙහෙයුම් සිදු කළ බ්‍රිතාන්‍ය කිමිඳුම්කරුවන් දෙදෙනකුටය.
ජලයෙන් යට නොවුණු එක් කුහරයක 13 දෙනා ආරක්ෂිතව සිටින බව පැවැසෙයි. මීළඟ අභියෝගය වී ඇත්තේ ජලයෙන් යටවුණු ලෙන් පද්ධතිය හරහා ඔවුන් පිටතට ගැනීමය. ඒ සඳහා නව මෙහෙයුමක් ආරම්භ කරමින් සිටින බව ද වාර්තා වේ.
දින නවයක් ලෙන තුළ සිරවී අකරතැබ්බට මුහුණ දුන්නේ ‘මූ පා’ නමැති පා පන්දු කණ්ඩායමේ සාමාජිකයන් 12 දෙනා සහ ඔවුන්ගේ 25 හැවිරිදි පුහුණුකරු එක්කාපෝල් ජන්තාවොන්ග්ය.
මෙම කණ්ඩායම නිරන්තරයෙන් වීර චාරිකාවල යෙදෙන බවත්, ඔවුන් චියංග් රායි පළාතේ පිහිටි තාම් ලුන්ග් නමැති ලෙන් පද්ධතියේ මීට පෙර ද අවස්ථා කිහිපයකදී චාරිකාවල නියැලී ඇති බවත් වාර්තා වේ.
වයස අවුරුදු 11ත් 16 අතරේ මෙම දරුවන් 12 දෙනා සහ ඔවුන්ගේ පුහුණුකරු ලෙන තුළ සිරවුණු බව දැනගත් සැණින් ඔවුන් සොයා මෙහෙයුම් ආරම්භ කිරීමට තායිලන්ත රජය කටයුතු කළ අතර විදෙස් සහාය ද ලබා ගත්තේය.
චීනය, මියන්මාරය, ලාඕසය, ඕස්ටේ්‍රලියාව, ඇමෙරිකාව සහ බ්‍රිතාන්‍යය යන රටවලින් සහන සේවකයන් සහ දිවි ගලවා ගැනීමේ කටයුතුවල නියැලෙන විශේෂඥයන් දහසකට වැඩි පිරිසක් අතුරුදන් කණ්ඩායම සෙවිමේ මෙහෙයුම්වලට සම්බන්ධ විය.
(රොයිටර්)
