ඓතිහාසික හමුව
උතුරු කොරියානු නායක කිම් ජොන් උන් සහ දකුණු කොරියානු ජනාධිපති මූන් ජේ ඉන් සහභාගී වන ‘කොරියන් සමුළුව’ දෙරට දේශසීමාවේදී ආරම්භ විය.
උතුරු කොරියානු නායකයා සහ දකුණු කොරියානු ජනාධිපති මූන් ජේ ඉන් මුහුණට මුහුණ හමුවුණු පළමු අවස්ථාව මෙයයි. සමුළුව ඇරැඹුණේ දැඩි ආරක්ෂාවක් මැදය. දකුණු කොරියානුවන් උතුරු කොරියානු නායකයා පිළිගැනීමට පිළිගැනීමේ උත්සවයක් ද සංවිධානය කර තිබුණි.
උතුරු කොරියානු නායකයා සමඟ ඔහුගේ නැගණිය ඇතුළු උතුරු කොරියානු රජයේ නියෝජිතයන් සහ හමුදා ප්‍රධානීහු ද සමුළුවට සහභාගීවීමට පැමිණ සිටිති. දකුණු කොරියානු නායකයා උතුරු කොරියානු නියෝජිත පිරිස සමඟ සමරු ඡායාරූපවලට ද එක් විය.
සමුළුව පැවැත්වෙන්නේ දේශසීමාවේ, දෙරටටම පොදු ‘සාම නිවස’ යන නමින් හැඳින්වෙන ගොඩනැගිල්ලේදීය. දකුණු කොරියානු ජනාධිපති මූන් ජේ ඉන් සමඟ උතුරු කොරියානු නායක කිම් ජොන් උන් දේශසීමාවේ දකුණු කොරියාවට අයත් පාජු පළාතේ පන්ජුන්නොම් දේශසීමා ගම්මානයට ද පැමිණියේය.
ඒ අනුව, කොරියානු යුද්ධය අවසන් වී, 1953 වසරේන් පසු, දකුණු කොරියාවට පය තැබූ පළමු උතුරු කොරියානු නායකයා ලෙස කිම් ජොන් උන් ඉතිහාසයට එක්වුණු බව විදෙස් මාධ්‍ය වාර්තා පෙන්වා දෙයි. සමුළුව ආරම්භ වූයේ දකුණු කොරියාවේ වේලාවෙන් උදේ 9.30 ටය.
(ඒ.එෆ්.පී.)
