නාසි ආචාරය නිසා චීන්නු අත්අඩංගුවේ
ජර්මන් පාර්ලිමේන්තුව ඉදිරිපිටදී නාසි හමුදා ආචාරය අනුකරණය කළ චීන සංචාරකයන් දෙදෙනෙකු පසුගිය 5 වැනිදා අත්අඩංගුවට ගෙන ඇත.
මෙලෙස අත්ඩඅංගුවට පත්ව ඇත්තේ තිස් හය හැවිරිදි සහ හතළිස් නව හැවිරිදි චීන පුද්ගලයකින් දෙනෙකුය.මෙම සංචාරකයන් දෙදෙනාට එරෙහිව නඩු විභාගයක් පැවැත්වීම සඳහා චෝදනා ගොනු කර ඇති අතර එක් අයෙකුට යූරෝ 500 බැගින් වූ මුදල් ඇපයක් මත නිදහස් කර තිබේ.
හිට්ලර්ට සහ නාසි හමුදාවට අදාළ සංකේත භාවිතා කිරීම ජර්මනියේ නීතියෙන් තහනම් වන අතර ඊට එරෙහිව දැඩි දඬුවම් හිමිවනු ඇත.ජර්මන් පොලිසිය කියා සිටියේ හිට්ලර්ගේ තහනම් ආචාරය අනුකරණය කළ මෙම චීන ජාතිකයන් දෙදෙනාට තුන් වසරක සිර දඬුවමක් හෝ මුදලින් දඩයක් නියම විය හැකි බවය
ජර්මනියේ අන්ත දක්ෂිණාංශික කණ්ඩායම්වල සාමාජිකයන්ට ද බොහෝ විට නඩු පැවරෙන්නේ මෙම චෝදනාව මතය.කෙසේ නමුත් නඩු විභාගය ආරම්භ වීමට පෙර මෙම චූදිතයන් ජර්මනියෙන් පිටවී යාමට ඉඩකඩ ඇති බව බර්ලින් පොලිසියේ ප්‍රකාශිකාව පැවසුවාය.එසේ වුවහොත් ඇප මුදලින් දඩ මුදල ආවරණය වනු ඇත.
ජර්මානු පාර්ලිමේන්තු ගොඩනැගිල්ල ඉදිරිපිට දී මෙම සංචාරකයන් දෙදෙනා හිට්ලර් ගේ ආචාරය අනුකරණය කරමින් සිට ඇත්තේ තම ජංගම දුරකථනය මගින් එකිනෙකාගේ ඡායාරූප ගැනීම සඳහා ය.
( තිළිණි ද සිල්වා )
බී.බී.සී ඇසුරෙනි.
