ත්‍රස්තවාදය අඩුම රට ශ්‍රී ලංකාව
ඕස්ට්‍රේලියාවේ සිඩ්නි නුවර කේන්ද්‍රකොටගත්, ආර්ථික විද්‍යාව සහ සාමය සඳහා වූ ජාත්‍යන්තර ආයතනය, ත්‍රස්තවාදයේ බලපෑම මත රටවල් ශ්‍රේණිගත කිරීම අනුව, 2025 වසර සඳහා එළිදැක්වූ ගෝලීය ත්‍රස්තවාදී දර්ශකයේ ත්‍රස්ත තර්ජන අඩුම රටක් ලෙස ශ්‍රී ලංකා ලෙස නම් කර ඇත.
2024 වසරේ ගෝලීය ත්‍රස්තවාදයේ බලපෑම පිළිබඳව සිදුකරනු ලැබූ විශ්ලේෂණවලට අනුව, මෙම 2025 වසරේ ගෝලීය ත්‍රස්තවාදී දර්ශකය සකස් කර ඇත.
ලෝක ජනගහණයෙන් සියයට 99.7 ක් ආවරණය වන පරිදි රටවල් 163 ක් සඳහා ත්‍රස්තවාදයේ බලපෑම විශ්ලේෂණය කරමින් ගෝලීය ත්‍රස්තවාදී දර්ශකය ප්‍රකාශයට පත් කර ඇති බව ද පැවැසයි.
ඒ අනුව, ලෝකයේ වැඩිම ත්‍රස්තවාදී අවදානමක් ඇති රට ලෙස අප්‍රිකා රාජ්‍යයක් වන බුර්කිනා ෆාසෝ ලැයිස්තුවේ පෙරමුණේ පසුවන අතර, එම ලැයිස්තුවේ දෙවන ස්ථානයේ ඇත්තේ පාකිස්තානයයි. තෙවැනි ස්ථානයේ ඇත්තේ සිරියාවය.
2023 වසරේ, මෙම දර්ශකයේ 36 වන ස්ථානයේ පසු වූ ශ්‍රී ලංකාව ස්ථාන 64 ක් පහතට ගමන් කර ඇති අතර, දකුණු ආසියානු කලාපයේ ත්‍රස්ත තර්ජන අඩුවීම අතින් වඩාත් දියුණුම රට ලෙස ද ප්‍රකාශයට පත් කර තිබේ.
දකුණු ආසියානු කලාපයේ පසුගිය වසර පහ තුළ කිසිදු ත්‍රස්ත ප්‍රහාරයක් වාර්තා නොවූ රටවල් අතරට ශ්‍රී ලංකාව සහ භූතානය අයත් වෙයි.
2019 වසරෙන් පසු අඛණ්ඩව, ත්‍රස්ත තර්ජන අඩුවුණු බව ආර්ථික විද්‍යාව සහ සාමය සඳහා වූ ජාත්‍යන්තර ආයතනය පෙන්වා දෙයි.
