ලොව වායු දූෂණය වැඩිම නගරය නිව්යෝක්
ලෝකයේ වායු ගුණත්ව දර්ශකයට අනුව, ලොව වායු දූෂණය වැඩිම නගරය බවට පත් වී ඇත්තේ ඇමෙරිකාවේ නිව්යෝක් බව විදෙස් මාධ්‍ය පවසයි.
මේ වනවිට නිව්යෝක් නගරයේ වායු ගුණත්වය සෞඛ්‍යයට අහිතකර අගයක් දක්වා වර්ධනය වී ඇති බවත්, එය බරපතල තත්ත්වයක් බවත් විද්‍යාඥයෝ අනතුරු අගවති.
නිව්යෝක් නුවර මේ අයුරින් වායු දූෂණයට හේතුව කැනඩාවේ ප්‍රාන්ත කීපයක පාලනය කිරීමට නොහැකි අයුරින් පැතිරෙන ළැව් ගිනි යැයි කාලගුණ විද්‍යාඥයෝ පැහැදිලි කරති.
මේවනතුරු ලෝකයේ වායු ගුණත්ව දර්ශකයට අනුව පළමු සහ දෙවැනි ස්ථානයේ පැවැතියේ ඉන්දියාවේ නවදිල්ලි අගනුවර සහ චීනයේ බෙයිජීං අගනුවරය.
නව වායු ගුණත්ව දර්ශකයට අනුව, නිව්යෝක් නගරය අංක 1 ස්ථානයට පත් වෙද්දී, නවදිල්ලිය දෙවැනි ස්ථානයටත්, බෙයිජීං අගනුවර තෙවැනි ස්ථානයටත් පත් වී ඇත.
මේ වනවිට ඇමෙරිකාවේ මිනසෝටා සහ විස්කොන්සින් ප්‍රාන්තවල වායු දූෂණය ද අහිතකර තත්ත්වයට පත් වී ඇතැයි ඇමෙරිකන් කාලගුණ විද්‍යාඥයෝ වැඩි දුරටත් අනතුරු අඟවා තිබේ.
