යුක්රේන හමුදා කොරියන් සෙබළුන් සමඟ සටන් කරලා
යුක්රේන හමුදා, පළමු වරට, උතුරු කොරියන් සොල්දාදුවන් සමඟ සටන් ආරම්භ කර ඇතැයි පැවැසෙයි.
මේ බව අනාවරණය කළේ යුක්රේන ආරක්ෂක අමාත්‍ය රුස්ටෙම් උමෙරෙව්ය. ඒ, දකුණු කොරියාවේ කේ.බී.එස්. නාළිකාව සමඟ සම්මුඛ සාකච්ඡාවකට එක් වෙමිනි.
උතුරු කොරියානු සෙබළුන් 11,000 ක්, රුසියාවට ගොස් සිටින්නේ, රුසියාවට සහාය දක්වමින්, රුසියන් යුක්රේන යුද්ධයට සම්බන්ධ වීමටය. පසුගිය නොවැම්බර් 4 වැනිදා සිට උතුරු කොරියානු සෙබළුන්, රුසියන් සෙබළුන් සමඟ එක් වී, යුක්රේන සෙබළුන් සමඟ ගැටෙයි.
රුසියාව සහ යුක්රේනය සේම, රුසියාව සහ උතුරු කොරියාව ද එකිනෙකට මායිම් වෙයි. උතුරු කොරියාව ඇමෙරිකන් සම්බාධක හේතුවෙන් ලොවෙන් හුදෙකලා වී සිටී. ඇමෙරිකාව සම්බාධක පනවා ඇත්තේ උතුරු කොරියාවේ හිතුවක්කාර න්‍යෂ්ටික වැඩසටහන මුල්කොට ගනිමිනි.
රුසියන් ජනාධිපති ව්ලැදිමීර් පුටින් සහ උතුරු කොරියා නායක කිම් ජොන් උන් අතරේ යහපත් සබඳතා පවතී. ඇමෙරිකාව යුක්රේන යුද්ධය මුල්කොට ගනිමින්, රුසියාවට සම්බාධක පැනැවීමක් ද කර ඇත.
යුක්රේන හමුදා සටන් වැදීමට, රුසියාව අවි ආයුද සහ පතුරම් මිලදී ගන්නේ උතුරු කොරියාවෙනි. කොරියානු නායක කිම් ජොන් උන්, සිය සෙබළුන් යුක්රේනයට යවා ඇත්තේ පුටින් සමඟ පවතින මිත්‍රත්වය නිසාය.
රුසියන් යුක්රේන යුද්ධයට උතුරු කොරියාව ඔවුන්ගේ හමුදා සෙබළු යැවීම සම්බන්ධයෙන් ජාත්‍යන්තරය දැඩි පිළිවෙතක් අනුගමනය නොකිරීම කනස්සල්ලට කරුණක් බව යුක්රේන ජනාධිපති ව්ලොදිමීර් සෙලෙන්ස්කී චෝදනා කර ඇත.
(ඒ.එෆ්.පී.)
