බැලුකිස්තාන සටන්කාමීහු මගී දුම්රියකට පහර දෙති
පාකිස්තානයට අයත් බලුකිස්තාන ප්‍රාන්තයේ, මගී දුම්රියක් බිංගෙයක් හරහා ධාවනය වෙමින් තිබියදී එය නවත්වා, රියදුරු සහ නියාමකවරයා වෙඩි තබා ඝාතනය කර, දුම්රියේ සිටි මගීන් සියයකට වැඩි පිරිසක් ප්‍රාණ ඇපයට ගැනීමට බලුකිස්තානය වෙනුවෙන් වෙනම පාලනයක් ඉල්ලන, බෙදුම්වාදී සටන්කාමීහු කටයුතු කළහ.
දුම්රිය බිම්ගෙයට ඇතුළු වෙද්දී බෙදුම්වාදීන්, දෙකෙළවරින් එය වට කළ අතර, දුම්රිය මාර්ගයට බෝම්බ ගසා පුපුරුවා හැරියේය.
දුම්රියේ ආරක්ෂාවට, පාකිස්තාන ආරක්ෂක අංශ සාමාජිකයන් 10 දෙනකු දුම්රියේ ගමන් කරමින් සිටි අතර, සටන්කාමීන් එල්ල කළ වෙඩි ප්‍රහාරයෙන් එම පිරිස ද ජීවිතක්ෂයට පත්වූහ.
සටන්කාමීන්ගේ ග්‍රහණයට නතු වූයේ ජෆාර් එක්ස්ප්‍රෙස් මගී දුම්රියයි. දුම්රිය ක්වෙටා නගරයේ සිට පෙෂාවෝර් තෙක් ධාවනය වෙමින් තිබුණි. සටන්කාමීන් බිංගෙය වටලා දුම්රිය ඔවුන්ගේ ග්‍රහණයට ගනිද්දී, එහි මගීන් 400 දෙනකු සිටි බව ද පැවැසෙයි. කෙසේ නමුත් සටන්කාමීන්ගේ වෙඩි හඬ ඇසී බොහෝ දෙනකු දුම්රියෙන් පැන පලා ගිය බව පාකිස්තාන මාධ්‍ය වාර්තා කරයි.
දුම්රියේ සිටි මගීන් 104 දෙනකු ප්‍රාණ ඇපයට ගත්, සටන්කාමීන් ඔවුන් කඳුකරයට රැගෙන ගිය අතර, පාකිස්තාන හමුදාව එම පිරිස් මුදා හැරීමට විශේෂ මෙහෙයුමක් ඇරැඹුවේය.
බෙදුම්වාදීන්, දුම්රිය මගීන් ප්‍රාණ ඇපයට ගනිමින්, පාකිස්තාන රජයට බල කර තිබුණේ පාකිස්තාන ආරක්ෂක අංශ අත්අඩංගුවේ සිටින තම සාමාජිකයන් සහ දේශපාලන සිරකරුවන් නිදහස් කරන ලෙසටය.
කෙසේ නමුත් පාකිස්තාන ආරක්ෂක අංශ, දුම්රිය මගීන් රඳවා සිටි ස්ථානය සොයා ගත් අතර, එම සටන්කාමීන් සහ පාකිස්තාන හමුදාව අතරේ දරුණු අවි ගැටුම් ඇවිළිණි. එම අවි ගැටුම්වලින් පසු සටන්කාමීන් සියලු දෙනා මරා දමා ප්‍රාණ ඇපයේ සිටි පිරිස මුදා ගැනීමට හැකිවිය.
පැය 48 ක් ඇතුළත පාකිස්තාන හමුදාව ප්‍රාණ ඇපයයේ සිටි පිරිස මුදා ගනිමින්, සටන්කාමීන් ඝාතනය කිරීමට සමත් වීම පාකිස්තාන අග්‍රාමාත්‍ය ෂෙහ්බාස් ෂරීෆ්ගේ පැසැසුමට හේතුවක් ඇත.
බලුකිස්තාන බෙදුම්වාදී සටන්කාමීන්ගේ එම බියගුලු ක්‍රියාව තරයේ හෙලා දකින බව ද පාකිස්තාන අග්‍රාමාත්‍යවරයා වැඩි දුරටත් පැහැදිලි කර ඇත. බලුකිස්තාන ප්‍රාන්තයට වෙනම පාලනයක් ඉල්ලන බෙදුම්වාදී සටන්කාමීන්ට කිසිදු සමාවක් නොදෙන බව ද පාකිස්තාන අග්‍රාමාත්‍යවරයා ප්‍රතිඥා දුන්නේය.
(එන්.ඩී.ටීවී.)
