නාසා යානය හිරු ළඟටම යයි
ඇමෙරිකාවේ ‘නාසා’ ආයතනය හිරු ගවේෂණය කිරීමේ අරමුණින්, හිරු වෙත යැවූ ‘පාකර් සෝලර් ප්‍රෝබ්’ නමැති රොබෝ ගවේෂණ යානය හිරු අසලටම ගමන් කළේය. රොබෝ යානයක්, හිරු අසලටම ගිය පළමු අවස්ථාව මෙයයි.
රොබෝ යානය හිරුගේ බාහිර කලාපයට පිවිසීමත් සමඟ එය එය හිරුගේ අධික තාපයටත්, විකිරණවලටත් හසුවිය. යානය හිරුට සමීප වූයේ හිරුගේ සිට කිලෝ මීටර් මිලියන 6.2 කිනි. මෙම කලාපයේ උෂ්ණත්වය සෙල්සියස් අංශක 1,400 ට වැඩිය.
යානය හිරුගේ තාපයට සහ විකිරණවලට හසුවී විනාශ වූයේ ද නැද්ද යන්න දැන ගැනීමට අනිද්දා (28) වනතුරු බලා සිටිය යුතු බව නාසා විද්‍යාඥයෝ කියති. නාසා විද්‍යාඥයන් යානයෙන් යළි පිළිතුරු පණිවුඩයක් බලාපොරොත්තු වන්නේ 28 වැනිදාය. යානය සෙමින් සෙමින් හිරුගේ බාහිර ගෝලයට සමීප වූයේ හිරු වටා කක්ෂයක ගමන් කරමිනි.
හිරු ගවේෂණයට මිනිස් රොබෝ යානයක් යැවූ පළමු අවස්ථාව ද මෙයයි. ‘පාකර් සෝලර් ප්‍රෝබ්’ යානය හිරු ගවේෂණයට ගියේ 2018 වසරේදීය. යානය හිරුගේ අධික තාපයටත්, විකිරණවලටත් ඔරොත්තු දීමට හැකි අයුරින් විශේෂ තාක්ෂණයකින් නිර්මාණය කරනු ලැබ ඇත. යානයට කාබන් සංයුක්ත පලිහක් ද ඇත. එය සැමවිටම හිරු දෙසට හැරී ඇත. ‘පාකර් සෝලර් ප්‍රෝබ්’ යානයේ අරමුණ වන්නේ හිරු අධ්‍යයනය කර හිරුගේ රහස් සොයා ගැනීමය.
(ඒ.එෆ්.පී.)
