තවත් ප්‍රබල සූර්ය කුණාටුවක් පෘථිවිය දෙසට
තවත් සූර්ය කුණාටුවකින් පෘථිවියට බලපෑම් එල්ල වනු ඇතැයි ඇමෙරිකාවේ නාසා විද්‍යාඥයෝ අනතුරු අඟවති.
සූර්ය කුණාටුවක් යනුවෙන් තාරකා විද්‍යාඥයන් හඳුන්වන්නේ සූර්යයාගෙන් එකවර නිකුත් වන විකිරණ සහ ආරෝපිත අංශුවලින් සමන්විත ගිනි දැල්ය. මේවා සෞරග්‍රහ මණ්ඩලය පුරා විහිදෙයි.
මෙම නව සූර්ය කුණාටුව හේතුවෙන් පෘථිවි කක්ෂයේ රඳවා ඇති සන්නිවේදන චන්ද්‍රිකාවලට බලපෑම් එල්ල වනු ඇති බවත් එය සන්නිවේදන කටයුතු අඩපණ වීමට හේතුවක් වනු ඇති බවත් නාසා විද්‍යාඥයෝ පැහැදිලි කරති.
මීට දින කීපයකට පෙර ද මේ අයුරින් ප්‍රබල සූර්ය කුණාටුවකින් පෘථිවියට බලපෑම් එල්ල විය.
රටවල් බොහොමයක අහස ඔරෝරෝ බොරියාලිස් හෙවත් උත්තර ආලෝකයෙන් හැඩ ගැන්වූයේ ද එම සූර්ය කුණාටුව හේතුවෙනි. එම අවස්ථාවේදී බිලියනපති ඉලොන් මස්ක්ගේ සන්නිවේදන චන්ද්‍රිකා කීපයකට බලපෑම් එල්ල වූ බව ද වාර්තා විය.
(ඒ.එෆ්.පී.)
