චෝදනා 34 ම ට්‍රම්ප් වැරදිකරු වෙයි
නිල් චිත්‍රපට නිළියක සමඟ අනියම් ඇසුරක් පවත්වා, එය ‘යට ගැසීමට’ ස්ටෝමි ඩැනියෙල්ස් නමැති එම නිල් චිත්‍රපට නිළියට මුදල් ලබා දීම සම්බන්ධයෙන් පැවැති නඩු විභාගයේ දී ඇමෙරිකාවේ හිටපු ජනාධිපති ඩොනල්ඩ් ට්‍රම්ප් වරදකරු විය.
නිව්යෝක් මැන්හැටන් අධිකරණයක් හමුවේ නඩුව විභාග වූ අතර, ට්‍රම්ප්ට චෝදනා 34 ක් එල්ල වී තිබුණි.
හිටපු ජනාපධිතිවරයා චෝදනා සියල්ලටම වරදකරු විය. ඒ අනුව, අපරාධ චෝදනාවලට වරදකරු වූ එකම ඇමෙරිකන් හිටපු ජනාධිපතිවරයා වන්නේ ද ට්‍රම්ප් බව ඇමෙරිකන් මාධ්‍ය පවසයි.
ට්‍රම්ප්ගේ නඩු තීන්දුව ප්‍රකාශයට පත් කිරීමට නියමිතව ඇත්තේ ලබන ජූලි මාසයේදීය.
මෙම වසරේ නොවැම්බරයේ පැවැත්වෙන ඇමෙරිකන් ජනාධිපතිවරණයට ද ට්‍රම්ප් ඉදිරිපත් වෙයි. ඒ, වත්මන් ජනාධිපති ජෝ බයිඩන්ට අභියෝග කරමිනි.
ඇමෙරිකන් දේශපාලනයේ ප්‍රධාන පක්ෂ දෙකකි. ට්‍රම්ප් නියෝජනය කරන්නේ රිපබ්ලිකන් පකෂය වන අතර බයිඩන් නියෝජනය කරන්නේ ඩිමොක්‍රටික් පක්ෂයයි.
ජූලි මාසයේ අධිකරණ තීන්දුව ට්‍රම්ප්ගේ මැතිවරණ කටයුතුවලට විශාල බලපෑමක් එල්ල කරනු ඇතැයි දේශපාලන විශ්ලේෂකයෝ පෙන්වා දෙති.
තමන්ට එල්ල වූ සියලු චෝදනා ට්‍රම්ප් ප්‍රතික්ෂේප කර ඇති අතර, ඔහු මාධ්‍ය හමුවේ පෙන්වා දී ඇත්තේ, තම ප්‍රතිවාදීන්, දේශපාලනික වශයෙන් තමන් නිහඬ කිරීමට උත්සාහ ගන්නා බවය.
(ඒ.එෆ්.පී.)
