චිඩෝ කුණාටුව ප්‍රංශ දූපත කලඹයි
ඉන්දීය සාගරයේ මැඩගස්කරය අසල පිහිටි, ප්‍රංශයට අයත්, ප්‍රංශ රජයේ පාලනය යටතේ පවතින, මායෝත් දූපත හරහා සුළි කුණාටුවක් හමා ගියේය. සුළි කුණාටුවට හසුවීමෙන් සියයකට වැඩි පිරිසක් ජීවිතක්ෂයට පත් වුණු බවත් තවත් සිය ගණනක් තුවාල ලැබූ බවත් විදෙස් මාධ්‍ය පවසයි.
ලක්ෂ තුනකට වැඩි පිරිසක් ජීවත් වන මායෝත් දූපතට කඩා වැදුණේ, ‘චීඩෝ’ සුළි කුණාටුවය. කුණාටුව හමා ආවේ පැයට කිලෝ මීටර් 225 ක වේගයකිනි.
සුළි කුණාටුව සමඟ මහ වැසි ඇද හැලෙන්න වූ බව ද මයෝත් බලධාරීහු කියති. කුඩා නගර සහ ගම්මාන මුළුමනින්ම බිමට සමතලා වී ඇතැයි ද පැවැසෙයි. මායෝත් ප්‍රංශ වැසියන්ගේ නිවාඩු නිකේතනයක් ද වෙයි.මායෝත් දූපතේ මමෝඩ්සූ අගනුවරට ද සුළි කුණාටුවෙන් දැඩි හානි සිදු වී ඇත. ගස් කඩා වැටීමෙන් විදුලිබල සැපැයුම් මුළුමනින්ම නතර වී ඇත.
මායෝත් වැසියන්ට ආහාර සහ පානීය ජලය නොමැති බවත් ඒවා කඩිනමින් ලබා දීමට පියවර ගන්නා බවත්, සුළි කුණාටුවෙන් සිදුවුණු විපත දැනගත් සැණින් ප්‍රංශ ජනාධිපති මැක්රොන් කීවේය.
මායොත් වැසියන්ට අවශ්‍ය සියලු පහසුකම් කඩිනමින් ලබා දීමට පියවර ගන්නා බව ප්‍රංශ ජනාධිපති අදාල බලධාරීන්ට දැනුම් දුන්නේය. ප්‍රංශ හමුදාව ද විපතට පත්වුණු වැසියන්ට සහාය දැක්වීමට යවා ඇතැයි ද වාර්තා වේ.
(ඒ.එෆ්.පී.)
