කොරියන් මගී යානය බාද්දි අනතුරේ
පුද්ගලයන් 181 දෙනකු රැගෙන තායිලන්තයේ බැංකොක් අගනුවර සිට දකුණු කොරියාවට ආ දකුණු කොරියානු මගී ගුවන් යානයක් අද (29) උදෑසන අනතුරට පත් විය.
යානය අනතුරට පත් වූයේ එය දකුණු කොරියාවේ, මුවාන් ජාත්‍යන්තර ගුවන්තොටුපොළට ගොඩබාද්දීය. යානය ගුවන් ධාවන පථයට ගොඩබාද්දී එහි රෝද නිසි ලෙස ක්‍රියාත්මක නොවුණු බැවින්, එය ගුවන් පථයේ ලිස්සා ගොස් හැපී පුපුරා ගියේය.
යානය එක් වරක් ගුවන්තොටුපොළට ගොඩබෑමට උත්සාහ ගත් බවත්, එය අසාර්ථක වූ බවත් ගුවන් තොටුපොළ බලධාරීහු පවසති. යානය අනතුරට පත් වූයේ දෙවැනි වර ගොඩබද්දීය. යානය ධාවන පථයේ ලිස්සා ගොස් අනතුරට පත්වන අයුරු දැක්වෙන වීඩියෝ දසුන් මේ වනවිට විදෙස් මාධ්‍ය ඔස්සේ ප්‍රසිද්ධියට පත් වී අවසන්ය.
යානයේ සිටි 181 දෙනාගෙන් 175 දෙනකු මගීන් වන අතර, නියමුවන් ද ඇතුළු කාර්ය මණ්ඩල සාමාජිකයන් ගණන හයකි. යානයේ මගීන්ගෙන් වැඩි දෙනා කොරියානුවන් බවත්, තායිලන්ත ජාතිකයන් දෙදෙනකු ද සිටි බවත් මාධ්‍ය වාර්තා පෙන්වා දෙයි.
ගින්න නිවා සුන්බුන් පරීක්ෂා කරද්දී, 62 දෙනකුගේ සිරුරු සොයා ගත් බව දකුණු කොරියානු මාධ්‍ය වාර්තා පැවැසීය. එම පිරිස අතරේ කාන්තාවෝ 37 දෙනකු ද පිරිමි 25 දෙනෙකු ද සිටින බව දිවි ගලවා ගැනීමේ කණ්ඩායම් පවසා ඇත.
ඊට අමතරව, බරපතල තුවාල ලබා පණ බේරා ගත් දෙදෙනකු රෝහල්ගත කෙරුණු බව ද දකුණු කොරියානු මාධ්‍ය වාර්තා කළේය. තුවාල ලබා බේරා ගත්තේ ගුවන් සේවිකාවක සහ මගියකු බව ද මාධ්‍ය වැඩි දුරටත් වාර්තා කර තිබේ.
අනතුරට පත් වූයේ දකුණු කොරියාවේ ජේජු ගුවන් සේවයට අයත් බෝයිං 737-800 වර්ගයට අයත්, අංක 2216 ගුවන් යානයයි. යානය අනතුරට පත් වූයේ දකුණු කොරියාවේ වේලාවෙන් අද (29) උදෑසන 9.03 ට පමණය. යානය බැංකොක් අගනුවරින් පිටත් වී ඇත්තේ අලුයම 2.29 ටය.
යානය ගුවන් පථයේ ලිස්සා ගොස් හැපී, පුපුරා ගිනි ගනිද්දී, ගුවන්තොටුපොළ ගිනි නිවන භටයෝ වහා ක්‍රියාත්මක වී නිවා දැමීමට යුහුසුළු වූහ. ගින්න නිවා දැමීමට ගිනි නිවන ට්‍රක් රථ 32 ක් යොදා ගැනුණි.
(ඒ.එෆ්.පී.)
