ජනපති සටනින් බයිඩන් ඉවත් වුණොත් හොඳයි
ජනාධිපති සටනින්, වත්මන් ජනාධිපති ජෝ බයිඩන් ඉවත් වී, වෙනත් සුදුස්සකු ඩිමොක්‍රටික් පක්ෂ ජනාධිපති අපේක්ෂකයා ලෙස ජනාධිපතිවරණයට ඉදිරිපත් විය යුතු යැයි තමන් විශ්වාස කරන බව හිටපු ජනාධිපති බැරැක් ඔබාමා පවසයි.
බැරැක් ඔබාමා ඇමෙරිකාවේ පළමු කළු ජාතික ජනාධිපතිවරයාය. ඔබාමා ජනාධිපති ධුරය හෙබවූයේ 2009 සිට 2017 තෙක් කාලයේය. එම කාලයේ ඔබාමා සිය දෙවැනියා මෙන්ම උප ජනාධිපතිවරයා ලෙස ද තෝරා ගත්තේ ජෝ බයිඩන්ය.
ජෝ බයිඩන් පළමු වරට 2021 දී ඇමෙරිකන් ජනාධිපති ධුරයට පත් වෙද්දී, ඔහුට සහාය පළ කළේ ඔබාමාය. කෙසේ නමුත්, එලැඹෙන නොවැම්බර් 5 පැවැත්වෙන ජනාධිපතිවරණයට ඉදිරිපත් නොවිය යැයි ඩිමොක්‍රටික් පක්ෂයේ වැඩි දෙනකුගේ විශ්වාසය වී ඇති අතර, ඔබාමා ද ප්‍රසිද්ධියේ පවසා ඇත්තේ බයිඩන් ජනාධිපති සටනින් ඉවත් වන්නේ නම්, එය නුවණැති ක්‍රියාවක් වනු ඇති බවය.
බයිඩන්ට ගැටලුවක් වී ඇත්තේ ඔහුගේ වයසය. 81 හැවිරිදි බයිඩන්, ඇමෙරිකාවේ ජනාධිපති ධුරයට පත් වුණු වයස්ගතම පුද්ගලයා ද වෙයි. වයස නිසා බයිඩන්ට තීන්දු තීරණ ගැනීමේදීත්, අදහස් ප්‍රකාශ කිරීමේදීත් බාධා එල්ල වී ඇත. මෙය ප්‍රතිවාදී රිපබ්ලිකන් අපේක්ෂක ඩොනල්ඞ් ට්‍රම්ප්ට වාසියක් වී ඇත.
ප්‍රතිවාදී ට්‍රම්ප් පරාජය කිරීමට තමන්ට හැකි යැයි බයිඩන් දිගින් දිගටම පැවැසුවත්, බයිඩන්ගේ ඩිමොක්‍රටික් පක්ෂයේ වැඩි දෙනාගේ මතය වී ඇත්තේ, බයිඩන් වෙනුවනට තරුණ ජනාධිපති ධුර අපේක්ෂකයකු පක්ෂයෙන් ඉදිරිපත් කළ යුතු බවය.
(ඒ.එෆ්.පී.)
