උඩු ගුවනේ සිරවී සිටින ගගනගාමීන් ආපහු එනවා
දින 8 ක ගගන සංචාරයකට ගොස්, මාස 9 ක් තිස්සේ ජාත්‍යන්තර අභශවකාශ නැවැතුම්පොළේ කොටු වී සිටි ඇමෙරිකන් නාසා ගගනගාමීන් වන සුනීතා විලියම්ස් සහ බුච් විල්මෝර් යළි පෘථිවියට පැමිණීමට නියමිතය.
28 හැවිරිදි සුනීතා විලියම්ස් සහ 61 හැවිරිදි බුච් විල්මෝර් දෙදෙනා පසුගිය වසරේ ජූනි මාසයේ අභ්‍යවකාශයේ රඳවා ඇති ජාත්‍යන්තර අභශවකාශ නැවැතුම්පොළට ගියේ, ‘බෝයිං’සමාගම නිර්මාණය කළ‘ස්ටාර්ලයින්’ අභ්‍යවකාශ කැප්සියුලයෙනි.
‘ස්ටාර්ලයින්’ කැස්පියුලය අභ්‍යවකාශ නැවතුම්පොළට සම්බන්ධ වුණු අතර, එහි දෝෂයන් හටගත්තේ, සුනීතා විලියම්ස් සහ බුච් විල්මෝර් දින 8 කට පසු ආපසු පෘථිවියට පැමිණීමට සූදානම් වෙද්දීය.
පසුව යානය කිසිවකු නොමැතිව ආපසු ගෙන්වා ගැනීමට බෝයිං සමාගම සමත් වුණු අතර, විලියම්ස් සහ විල්මෝර් දෙදෙනා මාස 9 ක් තිස්සේ අභ්‍යවකාශ නැවතුම්පොළට කොටු වී සිටියහ.
නාසා ආයතනය ‘ස්පේස් එක්ස්’ සමාගමේ ‘ඩ්‍රැගන්’ ගගන කැප්සියුලයක් මේ වනවිට ගගනගාමීන් සිවු දෙනකු සමඟ අභ්‍යවකාශ නැවැතුම්පොළට යවා ඇත. ‘ඩ්‍රැගන්’ ගගන කැප්සියුලයක ඉඩකඩ ඇත්තේ ගගනගාමීන් සිවුදෙනකුට පමණි.
අභ්‍යවකාශ නැවැතුම්පොළට ගිය ගගනගාමීන් සිවු දෙනාගෙන් රුසියන් සහ ඇමෙරිකන් ගගනගාමීන් දෙදෙනා විලියම්ස් සහ විල්මෝර් සමඟ ඇමෙරිකාවේ වේලාවෙන් සවස 5.57 ට පමණ ආපසු පෘථිවය බලා පැමිණෙනු ඇති අතර, පැරෂූට් ආධාරයෙන් සුපුරුදු පරිදි ඩ්‍රැගන් කැප්සියුලය මුහුදට පතිත වනු ඇතැයි නාසා ආයතනය නිකුත් කළ නිවේදනයක දැක්වෙයි.
අත්දැකීම් බහුල නාසා ගගනගාමීන් දෙදෙනකු වුවත්, සුනීතා විලියම්ස් සහ බුච් විල්මෝර් දෙදෙනාගේ සෞඛ්‍ය තත්ත්වය සම්බන්ධයෙන් මේ වනවිට පෘථිවියේ සිටින වෛද්‍යවරුන් බිය පළ කර ඇත. ඔවුන් ආපසු පැමිණි සැණින් රෝහල්ගත කිරීමට වෛද්‍ය කණ්ඩායම් කීපයක් සූදානමින් සිටින බව ඇමෙරිකන් මාධ්‍ය වාර්තා පෙන්වා දෙයි.
(ඒ.එෆ්.පී.)
