උතුරු කොරියාවට ඇමෙරිකාවෙන් සම්බාධක
උතුරු කොරියානු රජයේ ඉහළ ප්‍රධානීන් පස් දෙනකුට එරෙහිව සම්බාධක පැනැවීමට ඇමෙරිකාව පියවර ගෙන තිබේ.
සම්බාධක පනවමින්, ඇමෙරිකන් රාජ්‍ය දෙපාර්තමේන්තුව පවසා ඇත්තේ, උතුරු කොරියාව පසුගිය දා සිදු කළ මිසයිල අත්හදා බැලීමට විරෝධය පළ කරමින් එසේ සම්බාධක පමුණුවන බවය.
උතුරු කොරියාව නව මිසයිලයක් අත්හදා බැලුවේ පසුගිය 11 වැනිදාය. එය තවත් හයිපර් සොනික් වර්ගයේ වේගවත්, දිගු දුර මිසයිලයක් බවත්, මිසයිල අත්හදා බැලීම සාර්ථක වූ බවත් උතුරු කොරියාව පවසයි.
මෙය උතුරු කොරියාවේ තෙවැනි හයිපර් සොනික් මිසයිල අත්හදා බැලීම වන අතර මෙම 2022 වසරේ සිදු කළ දෙවැනි හයිපර් සොනික් මිසයිල අත්හදා බැලීම ද වෙයි. මීට පෙර මිසයිල අත්හදා බැලීම සිදුවූයේ පසුගිය 5 වැනිදාය.
හයිපර් සොනික් මිසයිල යනු බැලැස්ටික් මිසයිලවලට වඩා ප්‍රබල අවියකි.
බැලැස්ටික් මිසයිල යනු එක් මහද්වීපයකින් තවත් මහද්වීපයකට විදිය හැකි මිසයිල වර්ගයක් වන අතර රේඩාර්වලට හසු නොවී ගමන් කළ හැකිය. හයිපර් සොනික් යනු බැලැස්ටික් මිසයිලවලටත් වඩා රහසේ රේඩාර් මඟහැර යා හැකි ආකාරයේ මිසයිල වර්ගයකි.
උතුරු කොරියාමේ මෙම නවතම හයිපර් සොනික් මිසයිල අත්හදා බැලීම පිළිබඳ තමන් ද විමසිල්ලෙන් පසුවුණු බව අසල්වැසි දකුණු කොරියාව පමණක් නොව, ජපානය ද පවසා තිබේ.
(රොයිටර්)
