පලස්තීන සිරකරුවෝ උමඟක් හාරලා පැනලා
උතුරුදිග ඊශ්රායලයේ අධි ආරක්ෂිත බන්ධනාගාරයකින් පලස්තීන සිරකරුවන් 6 දෙනකු පලා ගොස් ඇතැයි ඊශ්රායල ආරක්ෂක අංශ පවසයි.
මෙම සිරකරුවන් 6 දෙනා පලා ගොස් ඇත්තේ බන්ධනාගාරයේ සිට බන්ධනාගාරයේ තාප්පය මඟ හැර පිටතට යන ආකාරයට උමඟක් කැණීමෙන් යැයි ද පැවැසෙයි.
සිරකරුවන් පලා ගොස් ඇත්තේ 'ගිල්බෝවා' බන්ධනාගාරයෙන් යැයි අල් ජසීරා පුවත් සේවය පවසයි.
මෙම බන්ධනාගාරය ඊශ්රායල බන්ධනාගාර අතුරින් වඩාත්ම ආරක්ෂිත බන්ධනාගාරයක් ලෙස ද සැලකෙයි. මෙම බන්ධනාගාරයෙන් සිරකරුවන් පලා යෑමක් සිදුවුණු පළමු අවස්ථාව මෙය යැයි ද පැවැසෙයි.
පලා ගිය සිරකරුවන් 6 දෙනා සොයා මෙහෙයුම් ආරම්භ කර ඇති බවත් බන්ධනාගාර නිලධාරීන්ට ඊශ්රායල පොලිසියේත් හමුදාවේත් සහාය හිමි වී ඇති බවත්, නිල සුනඛයන් ද මෙහෙයුම් සඳහා යොදාගෙන ඇති බවත් පැවැසෙයි.
පලා ගිය සිරකරුවන් සොයා මේ වනවිට බටහිර ඉවුරේ පලස්තීන ප්රදේශ දැඩි ලෙස සෝදිසි කරන බව ද වාර්තා වේ.
(අල් ජසීරා)