හැරීගේ Spare



බ්‍රිතාන්‍යයේ හැරී කුමරුන්ගේ චරිතාපදාන කෘතිය ‘ස්පෙයාර්’ Spare මහත් ආන්දෝලනයක් ඇති කළා පමණක් නොව, ගිනස් ලෝක වාර්තාවක් ද පිහිටුවීමට ද සමත් විය. ඒ, එළිදැක්වූ සැණින්, එක් දිනක් තුළ, උණු කැවුම් මෙන් අලෙවි වෙමින්, වැඩිම අලෙවියක් වාර්තා කළ, ප්‍රබන්ධ නොවන කෘතිය ලෙසිනි.

‘ස්පෙයාර්’ එළිදැක්වීම සිදුවූයේ පසුගිය ජනවාරි 10 වැනිදාය. බ්‍රිතාන්‍යය, ඇමෙරිකාව, කැනඩාව යන රටවල හැරී කුමරුන්ගේ චරිතාපදානය පළමු දිනෙය්දීම පිටපත් මිලියන 1.43ක් අලෙවි වුණු බව බටහිර මාධ්‍ය වාර්තා කර ඇත. ‘ස්පෙයාර්’ එළිදැක්වීම සිදුවූයේ භාෂා 16 කට පරිවර්තනය කරමින් වීම ද විශේෂත්වයකි. මීට පෙර, එළිදැක්වූ පළමු දිනයේ, වැඩිම අලෙවියක් වාර්තා කළ ප්‍රබන්ධ නොවන කෘතිය ලෙස ගිනස් වාර්තාව අතරට එක් වී තිබුණේ, ඇමෙරිකාවේ හිටපු ජනාධිපති බැරැක් ඔබාමා විසින් රචනා කරනු ලැබූ ‘අ ප්‍රොමිස්ඩ් ලෑන්ඩ්’ කෘතියයි. ‘අ ප්‍රොමිස්ඩ් ලෑන්ඩ්’ එළිදැක්වීම සිදුවූයේ 2020 වසරේදීය. ඔබාමාගේ ‘අ ප්‍රොමිස්ඩ් ලෑන්ඩ්’ පළමු දිනයේදී පිටපත් අටලක්ෂ අසූහත්දහසක් අලෙවි වී තිබේ. හැරී කුමරුගේ කෘතිය ප්‍රකාශයට පත් කළ ‘පෙන්ගුයින් රැන්ඩම් හවුස්’ ප්‍රකාශන ආයතනයේ නිවේදනයකට අනුව, මේ වන විට එම කෘතියේ දෙවැනි මුද්‍රණය ද වෙළෙඳපොළට නිකුත් වී අවසන්ය. මේවනවිට පළමු මුද්‍රණයේ පිටපත් මිලියන 2 ක් දින 5 ක් ඇතුළත අලෙවි වී අවසන්ය. ‘ස්පෙයාර්’ පිටු 416 කින් සමන්විතය.

‘ස්පෙයාර්’ Spare යනු හැරී කුමරුන්ය. පොත නම් කර ඇත්තේ ඒ අනුවය. හැරී කුමරුන් ‘ස්පෙයාර්’ යනුවෙන් සිය චරිතාපදානය නම් කර ඇත්තේ, තමන් උපන් වේලේ තම පියා චාල්ස් කුමරු (වත්මන් චාල්ස් රජු) හැරී කුමරු හැඳින්වීමට යොදා ගත් ‘අන්වර්ථ නාමය’ එය වූ බැවිනි. රජ පවුලේ කිරුළ හිමි වන්නේ වැඩිමල් පිරිමි දරුවාවටය. චාල්ස් රජුගෙන් පසු කිරුළ හිමි වන්නේ හැරී කුමරුන්ගේ අයියණ්ඩිය වන විලියම් කුමරුන්ටය. ‘ස්පෙයාර්’ Spare යනු ‘අතිරේක’ එසේත් නැතිනම් ‘අමතර’ අර්ථයයි. රජ පවුලේ දෙවැනි පුත්‍රයා ‘ස්පෙයාර්’ ලෙස හැඳින්වීම සම්ප්‍රදාය බව පැවැසෙයි. එය අපහාසාත්මක වදනක් නොවෙයි. එසේ හැඳින්වෙන්නේ වැඩිමල් පුතු යම් අවාසනාවන්ත ඉරණමකට ලක් වුවහොත් රජකම බාර ගැනීමට සිටින ඊළඟ සුදුස්සා යන අරුතිනි. එදා චාල්ස් කුමරු, පුතු හැරී කුමරු පළමුවෙන් ‘ස්පෙයාර්’ කියා හඳුන්වා ඇත්තේ හැරී කුමරු උපන් වේලාවේ ඩයනා කුමරියට ස්තුති කරමිනි. එය සිහිපත් කරමින් තමන් තමන්ගේ චරිතාපදානය ‘ස්පෙයාර්’ යන නමින් නම් කළ බව හැරී කුමරු පැහැදිලි කර තිබේ.

හැරීගේ මව ඩයනා කුමරිය වුවත්, හැරීගේ සැබෑ පියා චාල්ස් නොවන බවට රාවයක් අතීතයේ සිට පැවත එයි. ඒ ගැන ද චරිතාපදානයේ සඳහන් වෙයි. ඇතැමුන්ගේ අදහස හැරී කුමරු, ඩයනා කුමරිය සහ ඇගේ පැරැණි පෙම්වතකු වූ මේජර් ජේම්ස් හුවෙට් බවය. හැරී කුමරු, චාල්ස්ගේ දරුවකු නොවන බවට රාවයක් පැතිර ගියේ හැරීට ඇත්තේ රතු හිස කෙස් නිසාය. මේජර් ජේම්ස් හුවෙට්ට ඇත්තේ ද රතු හිස කෙස්ය. හැරී කුමරුන්ගේ කෘතියේ සඳහන් ආකාරයට, පියා චාල්ස් අවස්ථා ගණනාවකදී,  හැරී කුමරුන් සමඟ බහින්බස් වෙද්දී, හැරී කුමරු තමන්ගේ දරුවකු නොවන්න පුළුවන් යැයි පවසා ඇත. ඊට තමන්ගේ සිත පෑරුණු බව හැරී කුමරු සිය කෘතියෙහි සඳහන් කර තිබේ.

අවාසනාවන්ත අයුරින්, ඩයනා කුමරිය රිය අනතුරින් මියයද්දී හැරී කුමරුන්ගේ වයස අවුරුදු 12 කි. එම අවස්ථාවේ තමා සහ විලියම් කුමරු ස්කොට්ලන්තයේ බැල්මොරාල් මාලිගාවේ (දෙවැනි එලිසබත් මහ රැජින අවසන් සුසුම් හෙලුවේ මෙම මාලිගයේදීය) නිඳා සිටි බවත්, පියා චාල්ස් කුමරු පැමිණ ඔහු සැනසීමට උත්සාහ කළ බවත් හැරී කුමරු සිය චරිතාපදානයේ සඳහන් කර තිබේ. ‘ඔවුන් (​​වෛද්‍යවරුන්) හුඟක් උත්සාහ කළා. ඒත් ඇය බේරා ගන්න බැරිවුණා’ යනුවෙන් එදා චාල්ස් කුමරු කී වදන් තමන්ගේ සිතට තදින් කා වැදුණු බව හැරී කුමරු පවසා ඇත. හැඟීම්වලින් තොර තැනැත්තකු වුණු චාල්ස් තමන් වැළඳගෙන සැනසුවේ හෝ නැතැයි ද හැරී වැඩිදුරටත් පවසා තිබේ. ‘හැමදේම හරි යාවි’ යැයි චාල්ස් කුමරුන් එදා පැවැසුවත්, එතැන් පටන් කිසිවක් හරි නොගිය බව හැරී කුමරු සිය චරිතාපදානය හරහා පැහැදිලි කර ඇත. මව ඩයනා කුමරිය මියගිය අවස්ථාවේ තමන් කඳුළු සැලුවේ නැති බවත් එම අවස්ථාවේ තමන් සිටියේ ලොකු කම්පනයකින් බවත් හැරී කුමරු වැඩිදුරටත් පවසා තිබේ.

2022 වසරේ ඇමෙරිකාවේ සිට එක්සත් රාජධානිය බලා තමන් පැමිණියේ රෝගී වී සිටි දෙවැනි එලිසබත් මහ රුජින බැහැදැකීමට බවත්, රැජින මියගිය බව තමන් දැන ගත්තේ එංගලන්තයට ගොඩබැසීමෙන් පසුව බවත් හැරී කුමරු අනාවරණය කර ඇත. විලියම් කුමරු සහ රජ පවුලේ සෙසු සාමාජිකයන් රැජින මියගිය අවස්ථාවේ ස්කොට්ලන්තයේ බැල්මොරාල් මාලිගයට ගිය නමුත්, තමන්ට එහි යෑමට අවසර නොලැබුණු බවත් හැරී කුමරු පවසා තිබේ.

හැරී කුමරු සිය පළමු ලිංගික අත්දැකීම ද ‘ස්පෙයාර්’ චරිතාපදානයට ඇතුළත් කර තිබීම, කාගේත් මවිතයට හේතුවකි. පළමු ලිංගික අත්දැකීම ලබද්දී, හැරී කුමරුන්ගේ වයස අවුරුදු 16 ක් හෝ 17 ක් පමණ වන්නට ඇතැයි ඔහු චරිතාපදානය අඩංගු වන විස්තරවලින් පැහැදිලි වෙයි. කුමරු එම ලිංගික අත්දැකීම ලබා ගෙන ඇත්තේ වැඩිමල් කාන්තාවක ඇසුරු කරමින් බවත්, එම තැනැත්තිය අශ්වයන්ට කැමැති අයකු බවත් හැරී පවසා ඇත. කාන්තාවගේ අනන්‍යතාව හැරී කුමරු අනාවරණය කර නැති නමුත් බොහෝ දෙනකු පවසා ඇත්තේ එම තැන්තිය බ්‍රිතාන්‍ය නිළියක මෙන්ම මෝස්තර නිරූපිකාවක ද වන ලිස් හර්ලි විය හැකි බවය.

විලියම් කුමරුගේ බිරිඳ කේට් මිඩ්ල්ටන් සහ හැරී කුමරුන්ගේ බිරිඳ මෙගාන් මාකෙල් අතර ගැටුම ද හැරී කුමරු සිය චරිතාපදානය හරහා විස්තර කර තිබේ. හැරී සමඟ විවාහ වෙද්දී මෙගාන් මාකෙල් අසාර්ථක විවාහයකින් පසු දික්කසාද වූ ඇමෙරිකන් තරුණියකි. ඇය ඇමෙරිකන් කළු ජාතික සම්භවයක් ඇති තැනැත්තියක ද වන්නීය. ටෙලි නිළියක ලෙස මෙගාන් ජනප්‍රිය වූයේ ‘සූට්ස්’ නමැති රූපවාහිනී ටෙලි කතා මාලාවෙනි. හැරී සහ මොගාන්ගේ විවාහය සිදුවූයේ 2018 දීය. කේට් මිඩ්ල්ටන් සහ මෙගාන් මාකෙල් අතර නොහොඳ නෝක්කඩු එසැණින් ආරම්භ වී තිබේ. අවස්ථා ගණනකදී මෙගාන් හැඬූ කඳුළින් සිටි බව ද හැරී අනාවරණය කර ඇත. විලියම් කුමරු, මෙගාන්ගේ මූණට ඇගිල්ල දිගු කර මෙගාන්ට දොස් නගා තිබේ. ඒ, මෙගාන් නොදැනුවත්වම කේට් සම්බන්ධයෙන් කළ විහිළුවකටය. එම සිත් පෑරුණු විහිළුවට පාදක වූයේ කේට් මිඩ්ල්ටන්ගේ පුතු ලුවීගේ උපතය.

තම අයියණ්ඩිය විලියම් කුමරු තමන්ට පහර දුන් බව ද හැරී කුමරු සිය ස්වයං චරිතාපදානයේ සඳහන් කර තිබේ. ඒ මෙගාන් සම්බන්ධයෙන් හටගත් බහින්බස් වීමක් දුරදිග යෑමෙනි. තම අයියණ්ඩිය තමන්ට බිම වැටෙන්න පහර දුන් බව ද හැරී කුමරු පවසා ඇත. හැරී කුමරු මෙන්ම විලියම් කුමරු ද බ්‍රිතාන්‍ය රාජකීය හමුදාවේ සේවය කර තිබේ. බ්‍රිතාන්‍ය හමුදාවේ, ඇපාචි ප්‍රහාරක හෙලිකොප්ටර් නියමුවකු ලෙස සේවය කළ කාලයේ තමන් ඇෆ්ගනිස්තානයේ හමුදා මෙහෙයුම්වලදී සතුරන් 25 දෙනකු මරා දැමූ බව හැරී කුමරු ‘ස්පෙයාර්’ හරහා පවසා ඇත. හැරී කුමරු ඇෆ්ගනිස්තානයේ ඝාතනය කළේ තලේබාන් ඉස්ලාමීය  සටන්කාමීන් නොව සිවිල් වැසියන් 25 දෙනකු යැයි ඇෆ්ගන් තලේබාන් රජය පසුව ඊට පිළිතුරු දීමක් ද සිදු කර තිබේ.

සසෙක්ස් ආදිපාදවරයා යන ගෞරව නාමයෙන් ද හැඳින්වෙන හැරී කුමරු, බ්‍රිතාන්‍ය හමුදා සොල්දාදුවකු ලෙස ඇෆ්ගන් තලේබාන් ත්‍රස්තවාදීන් සමඟ සටන් වැදුණේ 2007-2008 කාලයේත් පසුව 2012 සහ 2013 කාලයේත්ය. ඇපාචි ප්‍රහාරක හෙලිකොප්ටර් නියමුවකු ලෙස හැරී කුමරු මෙහෙයුම් 6 කට සම්බන්ධ වී ඇත. හමුදා සොල්දුදුවකු ලෙස තමන් කළ කිසිවක් ගැන තමන් පසු තැවෙන්නේ හෝ ආඩම්බර වන්නේ හෝ නැතැයි ද හැරී කුමරු ‘ස්පෙයාර්’ චරිතාපදානය හරහා පවසා තිබේ. හැරී කුමරු වසර 10 ක් බ්‍රිතාන්‍ය හමුදා සේවයේ සිටියේය. මේ අතර. තමන් තරුණ කාලයේ කොකේන් ඇතුළු මත්ද්‍රව්‍ය සඳහා යොමු වී සිටි බවත්, ඒ ගැන තමන් පසුතැවෙන බවත් හැරී කුමරු පවසා ඇත.

හැරී කුමරු කළ මෙම අනාවරණ සම්බන්ධයෙන් බ්‍රිතාන්‍ය රජ පවුල කිසිදු ආකාරයක ප්‍රකාශයක් සිදු කර නැත. එසේ වුවත්, හැරී කුමරුන්ගේ පොත මුල්​කොට ගනිමින්, බ්‍රිතාන්‍ය රජ පවුලේ බෙදීමක් හටගෙන ඇති බව පැහැදිලිය. මේ අතර, නිරිතදිග එංගලන්තයේ ස්වින්ඩොන් නගරයේ බර්ට්ස් පොත්හල හැරී කුමරුගේ ‘ස්පෙයාර්’ ස්වයං චරිතාපදානය විකිණීම සඳහා ප්‍රදර්ශනයට තබා ඇති ආකාරය පිළිබඳ පසුගිය දා අන්තර්ජාලය තුළ කතා බහට ලක් විය. ඊට හේතුව වී ඇත්තේ එම පොත් සාප්පුවේ හැරී කුමරුගේ චරිතාපදානය විකිණීම සඳහා ප්‍රදර්ශනය කර ඇත්තේ බෙලා මැකී නමැති කතුවරියගේ ‘හව් ටු කිල් යෝර් ෆැමලි’ (ඔබේ පවුල වනසන්නේ කෙසේද?) යන නවකතාව සමඟ නිසාය. බර්ට්ස් පොත්හල හැරී කුමරුගේ ‘ස්පෙයාර්’ කෘතිය, ‘ඔබේ පවුල වනසන්නේ කෙසේද?’ නවකතාව සමඟ විකිණීමට තැබීමෙන් ‘ස්පෙයාර්’ චරිතාපදානය මගින් හැරී කුමරු තම රජ පවුලේ ගෞරවය හැරී කුමරු විනාශ කළ ආකාරය, බර්ට්ස් පොත්හල ජනතාවට පෙන්වීමට උත්සාහ ගෙන ඇතැයි සමාජ මාධ්‍ය ඔස්සේ බොහෝ දෙනා අදහස් දක්වා තිබේ. එය බොහෝ දෙනාගේ හාස්‍යයට හේතුවක් වී අවසන්ය. බර්ට්ස් පොත්හල ස්පෙයාර්’ චරිතාපදානය ප්‍රදර්ශනය කර ඇති ආකාරය පිළිබඳ සංසරණය වන ඡායාරූපය පිළිබඳ සමාජ මාධ්‍ය ජාලාවල විශාල වශයෙන් අදහස් හුවමාරු වන අතර එම ඡායාරූපයට විශාල පිරිසක් ‘ලයික්’ කර අවසන්ය.

ඩේලිමේල් ඇසුරිනි


RECOMMEND POSTS