නේපාලයේ ගුවන් අනතුර: විශේෂ විමර්ශනයක් ඇරැඹේ
නේපාලයේ ‘යෙටී’ ගුවන් සේවය අයත් ගුවන් යානය කඩා වැටී, යානයේ සිටි හැත්තෑ දෙදෙනා මියයෑම සම්බන්ධයෙන් කඩිනමින් විමර්ශනයක් පවත්වන්නැයි නේපාල අග්‍රාමාත්‍ය පුෂ්ප කමල් දාල් නියෝග කර තිබේ.
නේපාලය පමණක් නොව, මුළු ලොවම කැලැඹීමට සමත් වුණු එම අනතුර හේතුවෙන් අද (16) දිනය විශේෂ ශෝක දිනයක් ලෙස නම් කිරීමට ද අග්‍රාමාත්‍යවරුයා පියවර ගෙන තිබුණි.
කඩා වැටුණේ නේපාලයේ අභ්‍යන්තර ගුවන් යානයකි. යානය කත්මණ්ඩු සිට පොක්කාරා බලා පියාසර කරන්න විය. එය කඩා වැටුණේ පොක්කාරා නගරයේ අලුතින් ඉදිකළ ගුවන්තොටුපොළට කිලෝ මීටරයක් තිබියදීය. යානය කඩා වැටුණේ ගංගාවක් අසල වනගත ප්‍රදේශයකටය.
යානයේ සිටි හැත්තෑ දෙදෙනාගෙන් 15 දෙනකු විදේශිකයන් බවත්, එම 15 දෙනාගෙන් පස් දෙනකු ඉන්දියානුවන් බවත් නේපාල පුවත් සේවා වාර්තා කර තිබේ. කඩා වැටුණේ ද්විත්ව ඇන්ජිමක් ඇති ‘ඒ.ටී.ආර්.72’ ගුවන් යානයයි.
මෙය වසර 15 ක් පැරැණි නේපාල අභ්‍යන්තර ගුවන් ගමන්වල යෙදෙන යානයකි. යානය කඩා වැටී මියගිය පිරිස අතර පොඩි දරුවන් 6 දෙනෙක් වෙති.
ගුවන් යානා අනතුර සම්බන්ධයෙන් ඉන්දීය අග්‍රාමාත්‍ය නරේන්ද්‍ර මෝදි මියගිය අය වෙනුවෙන් සිය කනගාටුව පළ කර තිබේ. ගුවන් යානය කඩා වැටෙන අයුරු දැක්වෙන වීඩියෝ දසුන් පවා සමාජ මාධ්‍ය ඔස්සේ ප්‍රසිද්ධියට පත් වී ඇත.
යානයේ අනතුරට හේතුව මෙතෙක් අනාවරණය වී නැත. දිවි ගලවා ගැනීමේ නිලධාරීන් 3,000 යානය කඩා වැටුණු ස්ථානයට ගොස් සෝදිසි කළ නමුත්, ඔවුන්ට දිවි ගලවා ගත් කිසිවකු හමුවූයේ නැතැයි පැවැසෙයි.
(එන්.ඩී.ටීවී.)
