ඇමෙරිකාවේ තර්ජනය හමුවේ ඉන්දීය තහනම ඉවතට
කොරෝනා වයිරස රෝගීන් සඳහා ප්‍රතිකාරකයක් ලෙස නම්කර ඇති හයිඩ්‍රොක්සික්ලෝරොක්වීන් ඖෂධයේ අපනයන තහනම ඉවත් කිරීමට ඉන්දියාව එකඟ වී ඇත.
ඉන්දියාව විසින් ඖෂධය සඳහා පැනවූ අපනයන තහනම ඉවත් නොකළහොත් පලිගන්නා බවට ඇමරිකානු ජනාධිපති ඩොනල්ඩ් ට්‍රම්ප් මහතා විසින් අනතුරු ඇඟවීමෙන් පැය කිහිපයකට පසුව ඉන්දියාව මේ බව ප්‍රකාශ කළේය.
මැලේරියා රෝගය සඳහා භාවිතා කරන ක්ලෝරොක්වීන් වලට බොහෝ සෙයින් සමාන හයිඩ්‍රොක්සික්ලෝරොක්වීන් ඖෂධය රූමැටික් ආතරයිටීස් සහ දද වැනි චර්ම රෝග සඳහා ප්‍රථිකාර ලෙස යොදා ගනී.
හයිඩ්‍රොක්සික්ලෝරොක්වීන් ප්‍රතිවෛරස කාරකයක් ලෙස පසුගිය දශක කිහිපය පුරා වෛද්‍ය විශේෂඥයන් විසින් භාවිතා කළ ඖෂධයකි.
කෙසේවුවද සමහර වෛද්‍ය විශේෂඥයින් අනතුරු අඟවා ඇත්තේ එය කොවිඩ් - 19 සුවකරන බවට කිසිදු සාක්ෂියක් නොමැති බවයි.
ඖෂධය සම්පූර්ණයෙන්ම අපනයනය තහනම් කිරීමෙන් පසු ඉන්දියාව සඳහන් කළේ කොරෝනා වයිරසයෙන් දරුණු ලෙස පීඩාවට පත්ව සිටින රටවලට හයිඩ්‍රොක්සික්ලෝරොක්වීන් ඖෂධය ලබාදෙන බවයි.
ඊට අමතරව අසල්වැසි රටවලට යම් ප්‍රමාණයකින් ඖෂධය සපයන බවද ඉන්දියාව පැවසීය.
ජනපති ඩොනල්ඩ් ට්‍රම්ප් කියා සිටියේ ඇමරිකාවේ ආහාර හා ඖෂධ පාලකමණ්ඩලය විසින් කොරෝනා රෝගයට ප්‍රථිකාර කිරීම සඳහා හයිඩ්‍රොක්සික්ලෝරොක්වීන් ඖෂධය අනුමත කර ඇති බවයි. ජීවිත තර්ජනයක් ඇති රෝගියෙකුට එය භාවිතා කිරීම ගැටලුවක් නොවන බවද ඔහු පවසයි.
බීබිසී සෞඛ්‍ය වාර්තාකරු ජේම්ස් ගැලගර් පවසන්නේ, "හයිඩ්‍රොක්සික්ලෝරොක්වීන් රසායනාගාර අධ්‍යයන වලදී කොරෝනා වයිරසය අවහිර කරන බව පෙනෙන්නට තිබේ. එය උපකාරකයක් වියහැකි බව වෛද්‍යවරුන් කිහිපදෙනකු පවසා තිබේ." යනුවෙනි.
ඉන්දියාවේ තරමක් මිල අඩු ඖෂධයක් වන හයිඩ්‍රොක්සික්ලෝරොක්වීන් කොවිඩ් - 19 ප්‍රතිකාරකයක් ලෙස නම් කිරීමෙන් පසු මිලදී ගැනීම දැඩි ලෙස සීමා කර ඇත.
ඇමරිකාවේ කොරෝනා රෝගීන් 367 650ක් වාර්තා වන අතර මරණ 10 943ක් සිදුවී තිබේ.
ඉන්දියාවේ මේ වනවිට රෝගීන් 3981ක් වාර්තා වන අතර මරණ 114ක් සිදුවී ඇත.
