සනී ලියොන්ගේ කතාව
බොලිවුඩයේ සුරූපී සරාගිනිය සනී ලියොන්ගේ ජීවිත කතාව ඇසුරින්, වෙබ් ටෙලි කතා මාලාවක් නිර්මාණය කිරීමට නියමිත අතර, එම කතා මාලාවේ යොවුන් වියේ පසුවන සනී ලියොන් ලෙස රංගනයෙන් දායක වන්නේ 14 හැවිරිදි රයිසා සෞජානී ය.
රයිසා සෞජානී බොලිවුඩයට එක් වී සිටින යොවුන් නිළියකි. ඇගේ පළමු බොලිවුඞ් සිනමා නිර්මාණය පසුගිය 2017 වසරේ තිරගත වුණු ‘ඩොබාරා’ චිත්‍රපටයයි.
රයිසා සෞජානී, රංගනයෙන් එක්වන්නේ සනී ලියොන්ගේ අවුරුදු 12 ත් 15 ත් අතර චරිතය සඳහාය. මේ කාලයේ ඉන්දීය සම්භවයක් ඇති සනී ලියොන් කැනඩාවේ ජීවත් වූවාය. ඇය ලිංගික ජවනිකාවල පෙනී සිටි පෝර්න් ස්ටාර් නිළියක් වූයේ වයස අවුරුදු 18 දීය.
‘කරෙන්ජිත් කෝර්: සනී ලියොන්ගේ නෑසූ කතාව’ යන නමින් නම් කළ මෙම වෙබ් ටෙලි නාට්‍ය මාලාවට පාදක වන්නේ සනී ලියොන් පෝර්න් ස්ටාර් නිළියක වීමේත් ඉන්පසු ඉන්දියාවට ගොස් බොලිවුඞ් නිළියක බවට පත් වීමේත් කතාවය.
චරිතය කෙසේ රඟපෑ යුතුදැයි සනී ලියොන් හමුවී ඒ ගැන කරුණු කාරණා විමසා බැලීමට රයිසා සෞජානී ට පසුගිය දා අවස්ථාව උදා විය. ඇය සනී ලියොන් සමඟ ඡායාරූප කිහිපයකට ද පෙනී සිටියාය.
සනී ලියොන් තමන්ට හමුවුණු බොහොම සුන්දර මෙන්ම නිහතමානී චරිතයක් බවත්, ඇයගේ ජීවිත කතාව හරි අපූරු අත්දැකීමක් බවත් රයිසා සෞජානී මාධ්‍ය හමුවේ පැහැදිලි කර තිබේ.
සනී ලියොන් මුල් අවදියේදී රංගනයෙන් දායක වූයේ කරෙන්ජිත් කෝර් වොහ්රා යන නමිනි. සනී ලියොන් උපත ලැබුවේ 1981 මැයි 13 වැනිදාය. අද වනවිට ඇය 37 හැවිරිදි වියෙහි පසුවන්නීය. සනී ලියොන්ගේ සැමියා මාර්ක් වෙබර්ය. සනී ලියොන්, පෝර්න් ස්ටාර් කෙනකු ලෙස ලිංගික ජවනිකා රැසක පෙනී සිටින්නේ ද මෙම මාර්ක් වෙබර් සමඟය. දෙදෙනා විවාහ වූයේ 2011 වසරේදීය. සනී ලියොන් කැනඩාවේ පමණක් නොව, ඇමෙරිකාවේ ද පුරවැසිභාවය ලබා ගෙන ඇත.
(එන්.ඩී.ටීවී.)
