පොසිල ඉන්ධන මෝටර් රථ හදන්නේ නෑ



පොසිල ඉන්ධන භාවිතයෙන් ධාවන වන මෝටර් රථ නිෂ්පාදනය නැවැත්වීමට, ලොව විශාලතම මෝටර් රථ නිෂ්පාදකයා වන ජපානය තීරණය කර තිබේ.

ලොව ප්‍රධාන පෙළේ මෝටර් රථ නිෂ්පාදන සමාගම් රැසක් පිහිටා ඇත්තේ ජපානයේය. ජපන් අග්‍රාමාත්‍ය යොෂිහිදෝ සුගා ප්‍රමුඛ රජය, එම මෝටර් රථ නිෂ්පාදන සමාගම් සමඟ සාකච්ඡා කිරීමෙන් පසු, මෙම තීරණය ගෙන ඇත්තේ, ගෝලීය උෂ්ණත්වය ඉහළ යෑමේ ප්‍රධාන සාධකයක් වන පොසිල ඉන්ධන දහනය මගින් සිදුවන කාබන්ඩයොක්සයිඩ් විමෝචනය අවම කිරීමේ අරමුණින්ය.

හයිඩ්‍රො කාබන් අඩංගු ස්වාභාවික වායු, තෙල් (ඩීසල්, පෙට්‍රල් ආදී ඉන්ධන) සහ ගල් අඟුරු පොසිල ඉන්ධන ලෙස සැලකෙයි. පොසිල ඉන්ධන ස්වාභාවික, සාම්ප්‍රදායික බලශක්ති ප්‍රභවයකි. මේවා පොසිල ඉන්ධන ලෙස හැඳින්වෙන්නේ, ඔක්සිජන් රහිත පරිසරයක දිගු කලක් ජීවත් වන ජීවීන්ගේ ප්‍රතික්‍රියාවල ප්‍රතිඵලයක් ලෙස නිර්මාණය වන බැවිනි.

ලෝකයේ පොසිල සම්පත් සංචිතවලින් සියයට 70 ක් ගල් අඟුරු ද සියයට 14 ක් ස්වාභාවික වායු වර්ග ද සියයට 14 ක් තෙල් සම්පත්වලින් සමන්විත බව පරිසරවේදීහු පෙන්වා දෙති.

පොසිල ඉන්ධන භාවිතයේ දී සිදුවන කාබන් විමෝචනය හේතුවෙන් ගෝලීය උණුසුම ඉහළ යන අත අද අපට දකින්න ලැබෙන අහිතකර තත්ත්වයේ විපරිත කාලගුණ තත්ත්වයන් නිර්මාණය වන්නේ එහි ප්‍රතිඵලයක් වශයෙනි.

මේ වනවිට, ග්‍රීන්ලන්තයේ අයිස් තට්ටු දියවෙමින් පවතින අතර, තව වසර 100 කින් එම අයිස් තට්ටු සදහටම අතුරුදන් වී, සාගර ජල මට්ටම ඉහළ යනු ඇතැයි පරිසරවේදීහු බිය පළ කරති.

ජපන් රජය තීරණය කර ඇති අන්දමට වසර 2030 න් පසු පොසිල ඉන්ධනවලින් ධාවනය වන සියලු මෝටර් රථ නිෂ්පාදනය පමණක් නොව භාවිතය ද නවතා දැමෙනු ඇත.

ජපන් අග්‍රාමාත්‍ය සුගා වැඩි දුරටත් පවසා ඇත්තේ ඉදිරි වසර 10 ඇතුළත පොසිල ඉන්ධන මෝටර් රථ නිෂ්පාදනය අඩු කරමින්, ඒ වෙනුවට විද්‍යුත් සහ හයිබ්‍රීඩ් වර්ගයේ මෝටර් රථ නිෂ්පාදනයට ජපන් සමාගම් යොමු වනු ඇති බවය.

ජපන් රජය ගත් මෙම තීරණය ලෝකයේ යහපත වෙනුවෙන් ගත් වැදගත් තීරණයක් බව පරිසරවේදීහු පවසති. කාබන් විමෝචනය අවම කරමින්, ගෝලීය උණුසුම පිටුදැකීමට, 2015 දී ප්‍රංශයේ පැරිස් නුවරදී අත්සන් කළ පැරිස් සම්මුතියට ජපානය ද ඇතුළත් වෙයි. පැරිස් සම්මුතියේ ඉලක්ක සම්පූර්ණ කර ගැනීමට නම්, ගෝලීය වශයෙන් මෝටර් රථ සම්බන්ධයෙන් සීමා පැනැවීම කළ යුතුය යන්න පැරිස් සම්මුතියට අයත් රටවල පොදු මතය වී තිබේ.

පැරිස් සම්මුතියට අනුව, ඊට එක්වී සිටින ලොව ප්‍රධාන රටවලට කොන්දේසි හෝ සීමා පැනැවීම් සිදු කෙරෙන්නේ නැත. ඒ ඒ රටවල් තම අභිමතය පරිදි ගෝලීය උෂ්ණත්වය අවම කර ගැනීමට ක්‍රියාමාර්ග අනුගමනය කරයි. එම ක්‍රියාමාර්ග සම්බන්ධයෙන් වසර පහෙන් පහට වාර්තාවක් විශේෂඥ කමිටුවකට ඉදිරිපත් කළ යුතුවෙයි.

ටෝකියෝහිදීය (ඒ.එෆ්.පී.)


RECOMMEND POSTS

RELATED POSTS