මෝදිටත් එන්නත ලැබේ



ඉන්දීය අග්‍රාමාත්‍ය නරේන්ද්‍ර මෝදි, ‘කොවිඩ් 19’ වයිරසය ආසාදනය වීම වැළැක්වීමට නිපදවා ඇති, ‘කොවැක්සින්’ ප්‍රතිශක්තිකරණ එන්නත ලබා ගත්තේය.

‘කොවැක්සින්’ යනු ඉන්දියාවේ, ‘භාරත් බයෝටෙක්’ ඖෂධ නිෂ්පාදන සමාගමේ නිෂ්පාදනයකි. ඉන්දීය රජයේ අනුග්‍රහය ලැබෙන ‘භාරත් බයෝටෙක්’, එරට ප්‍රධාන පෙළේ ඖෂධ නිෂ්පාදන සමාගමකි.

‘ඉන්දියානු අප අපේ දේ අගය කරන්න ඕනෑ. මේ එන්නත හැදුවේ අපේ විද්‍යාඥයන්, අපේ වෛද්‍ය පර්යේෂකයන්, ඒ නිසා මා අපේ විද්‍යාඥයන්, අපේ තාක්ෂණය යොදා ගනිමින් නිපදවූ මෙම එන්නත ලබා ගන්නේ. එන්නත ආරක්ෂිතයි. ඒ වගේමයි වයිරසය වළක්වන්න ඊට පුළුවන්. මා ඉන්දියානුවන්ගෙන් ඉල්ලීමක් කරනවා.

කොවැක්සින් එන්නත ලබා ගන්න’ යැයි අග්‍රාමාත්‍ය මෝදි එන්නත ලබා ගැනීමෙන් පසු ට්විටර් පණිවුඩයක් පළ කරමින් කියා සිටියේය.

අග්‍රාමාත්‍ය මෝදි එන්නත ලබා ගැනීමට පැමිණ සිටියේ ඇසෑමයේ ‘ගන්චා’ යනුවෙන් හැඳින්වෙන සාටකයකින් සැරැසීය. ඇසෑම් ප්‍රාන්ත කාන්තාවන්ගේ ආශිර්වාදය, එම සාටකය පැලදීමෙන් හිමිවන බව විශ්වාසයයි.

අග්‍රාමාත්‍යවරයා එන්නත ලබා ගන්නා අයුරු එරට රූපවාහිනී නාළිකාවලින් සජීවීව විකාශය කෙරුණි.

අග්‍රාමාත්‍යවරයා එන්නත ලබා ගත්තේ නවදිල්ලි අගනුවර ඕල් ඉන්දියා වෛද්‍ය මධ්‍යස්ථානයේදීය. අග්‍රාමාත්‍ය මෝදිට එන්නත ලබා දීමට හෙදියන් දෙදෙනකු පෙරමුණ ගත් බවත්, එයින් එක් අයකු පුදුචෙරි ප්‍රාන්ත වැසියකු බවත් අනෙක් හෙදිය කේරළ ප්‍රාන්ත වැසියකු බවත් ඉන්දීය මාධ්‍ය වාර්තා සඳහන් කරයි.

සියයට සියයක් ඉන්දියාවේ නිෂ්පාදනයක් වන මෙම ‘කොවැක්සින්’ එන්නත සම්බන්ධයෙන් පසුගිය කාලයේ ආන්දෝලනයක් පැවැතිණි. ඒ, එන්නතේ සාර්ථකත්වය සහ එහි ආරක්ෂිත බව සම්බන්ධයෙන් තොරතුරු ප්‍රසිද්ධියට පත් කිරීමට ‘භාරත් බයෝටෙක්’ සමාගම අදිමදි කළ බැවිනි.

කෙසේ නමුත් ජනවාරියේ ‘භාරත් බයෝටෙක්’ සමාගමේ ප්‍රධානී ආචාර්ය ක්‍රිෂ්ණා එලා මාධ්‍ය හමුවේ එන්නත ගැන පැහැදිලි කළේය. එන්නත හදිසි භාවිතයට සුදුසු යැයි ඉන්දීය ඖෂධ පාලන අධිකාරිය නිර්දේශ කළේ ඉන්පසුවය.
ඒ අනුව, ‘ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්’ එන්නතත් සමඟ ඉන්දියානුවන්ට ‘කොවැක්සින්’ එන්නත ලබා දීම සිදුවිය.

‘ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්’ එන්නත නිපදවීම සිදු කරන්නේ ඉන්දියාවේ පූනේ පිහිටි ‘සේරම්’ ඖෂධ නිෂ්පාදන සමාගමය. ඉන්දියාාව් පිහිටි, විදේශ සඳහා ඖෂධ නිපදවන සමාගමක් වන්නේ මෙම ‘සේරම්’ සමාගමය. ඉන්දීය අග්‍රාමාත්‍ය මෝදිගේ මැදිහත් වී, ‘වැක්සීන් මෛත්‍රී’ යටතේ අසල්වැසි ආසියානු රටවලට ප්‍රදානය කෙරුණේ මෙම ‘කොවිෂීල්ඩ්’ එන්නතය.

‘භාරත් බයෝටෙක්’ සමාගමේ ප්‍රධානී ආචාර්ය ක්‍රිෂ්ණා එලා පෙන්වා දෙන අන්දමට ඉන්දියාවෙන් පිට රටවල් 12 ක, ‘කොවිෂීල්ඩ්’ එන්නත භාවිතයට ගැනීම සිදුවෙයි. එන්නත මිලෙන් අඩු බවත්, එය ගබඩා කිරීමට පහසු බවත් පැවැසෙයි.

නවදිල්ලියේදීය (එන්.ඩී.ටීවී.)


RECOMMEND POSTS