ජනපති - අගමැති වගකීම බාරගෙන වැඩ කරන්න



(චමිල් රූපසිංහ)

රට තුළ විශාල අසමගියක් ඇතිවී ඇති බවත් මෙම තත්ත්වය ආරම්භ වූ දා සිටම මහා සංඝරත්නය හා රටේ විද්වතුන් නොයෙක් අවස්ථාවලදී ප්‍රකාශ කළත් රජය ඒ සම්බන්ධව වගකීමක් බාර නොගත් බවත් එම නිසා රට තුළ මෙවන් තත්වයක් උද්ගත වී ඇති බවත් අස්ගිරි පාර්ශ්වයේ මහානායක අතිපූජ්‍ය වරකාගොඩ ඤාණරතන නාහිමිපාණෝ පවසති.

අද වන විට රට තුළ නොයෙක් ප්‍රදේශවල වල පොලිස් ඇදිරි නීතිය යොදා ඇති බවත් මේ ආකාරයට රට පැවතියහොත් මහා විනාශයකට රට පත් වන බවත් රජය ඒ නිසා විශේෂයෙන් අවධානය යොමු කර මේ ප්‍රශ්නය පිළිබඳව තීරණයක් ගැනීමට කටයුතු කළ යුතු බව මහානාහිමියෝ පැවැසූහ.

අස්ගිරි පාර්ශ්වයේ මහානායක අතිපූජ්‍ය වරකාගොඩ ඤාණරතන නාහිමිපාණෝ මෙසේද පැවැසුහ.

    ‘‘බොහෝ දෙනා අද කියන්නේ රටේ නායකයෙක් නෑ රජයක් නෑ රටේ ජනතාවට ආරක්ෂාවක් නෑ කියල ඒ බව රට දිහා බලන විටදී හා මේ ප්‍රශ්න දිහා බලන විට පේනව මේ බව වගකිව යුතු අයට නොයෙක් අවස්ථාවලදී දැනුවත් කළත් ඒ අය ගණන් නොගෙන නොඇසුන පරිදී හිටපු නිසා තමයි මේ තත්වයන් අද රට තුළ උදාවෙලා තියෙන්නෙ.

ඒ නිසා තව දුරටත් මේ තත්ත්වය උත්සන්න වුවහොත් විශාල හානියක් හා ජන හානියක් සිදුවෙනවා. ඒ නිසා මේ අවස්ථාවෙදීවත් අවධානයෙන් සැලකීමෙන් ජනාධිපතිවරයා සහ අගමැතිවරයා එකතුව කටයුතු කරනවානම් මේ ව්‍යවසනය විපත්තිය නැති කර ගන්න පුළුවන්. ඒ නිසා වගකීමෙන් මහාසංඝයා සඳහන් කර සිටින්නේ මේ ප්‍රශ්නය පිළිබඳව අවධානයක් යොමු කර මේ ප්‍රශ්නයට විසඳුම් සොයන්නට රජය කටයුතු කළ යුතු බව අස්ගිරි පාර්ශ්වයේ මහානායක අතිපූජ්‍ය වරකාගොඩ ඤාණරතන නාහිමිපාණෝ පැවැසූහ.


RECOMMEND POSTS