ඇමෙරිකාව ගිනිගත් හැටි



මැයි 25 වැනිදා, ඇමෙරිකාවේ මිනසෝටා ජනපදයේ මිනියැපොලිස් නගරයේ, පවුඩර්හෝන් පළාතේ,  අලෙවිසැලකින් මිනියැපොලිස් පොලිසියට ඇමතුමක් ලැබුණේ, වෙළෙඳසැලට පැමිණ සිටින පුද්ගලයකු සතුව ඇමෙරිකන් ඩොලර් 20 ක ව්‍යාජ මුදල් නෝට්ටුවක් ඇති බවටය. ඒ අනුව, එම ස්ථානයට මිනියැපොලිස් පොලිසියේ පොලිස් නිලධාරීන් සිවුදෙනෙක් පැමිණියහ. පොලිස් නිලධාරීන්, ව්‍යාජ මුදල් නෝට්ටු ඇතැයි කී පුද්ගලයා අත්අඩංගුවට ගත්තේය. මේ පුද්ගලයා 46 හැවිරිදි ජෝජ් ෆ්ලොයිඞ් ය. ඔහු අප්‍රිකන් ඇමෙරිකන් කළු ජාතිකයෙකි. පොලිස් අත්අඩංගුවේ සිටියදී ජෝජ් ෆ්ලොයිඞ් මියගියේය. අද ‘කොවිඞ් 19’ වයිරසයෙන් බැට කන ඇමෙරිකාව පුරා ළැව් ගින්නක් සේ විරෝධතා පැතිර යයි. එම විරෝධතා ජාත්‍යන්තරයට ද පැතිර ගොස් ඇත. විරෝධතා පැවැත්වෙන්නේ, ජෝජ් ෆ්ලොයිඞ් වෙනුවෙන් සාධාරණයක් ඉල්ලමින් හා කළු ජාතිකයන්ගේ ජීවිතවලට ද වටිනාකමක් ඇති බව පෙන්වා දෙමිනි.

ජෝජ් ෆ්ලොයිඞ්

මාංචු දැමීමෙන් පසු පොලිස් නිලධාරීහු ජෝජ් ෆ්ලොයිඞ් බිම පෙරළා ගත්හ. ෆ්ලොයිඞ් සිටියේ නිරායුධවය. පොලිස් නිලධාරින් සිවු දෙනා අතර සිටි සුදු ජාතික පොලිස් නිලධාරී ඩෙරික් චෝවින් පහත් වී, මුණින් අතට බිම දිගා වූ ෆ්ලොයිඞ්ගේ ගෙලෙහි දකුණු පැත්ත, එක් දණහිසකින් තද කර  ගන්න විය. මිනිත්තු 8 ක් සහ තත්ත්පර 46 ක් මෙසේ පොලිස් නිලධාරී ඩෙරික් චෝවින්, ජෝජ් ෆොයිඞ්ගේ ගෙල තද කරගෙන සිටියේය. ඩෙරික් චෝවින්, සමඟ එතැනට පැමිණ සිටි සෙසු පොලිස් නිලධාරීන් වූයේ ටෝ තාඕ, ජේ. ඇලෙක්සැන්ඩර් සහ තෝමස් ලේන් ය. චෝවින්, ෆ්ලොයිඞ්ගේ ගෙල තද කරගෙන සිටිද්දී, ජේ. ඇලෙක්සැන්ඩර්, ෆ්ලොයිඞ්ගේ පිට තද කරගෙන සිටි අතර, තෝමස් ලේන් ෆ්ලොයිඞ්ගේ පාදවලින් අල්ලා ගත්තේය. පොලිස් නිලධාරී ටෝ තාඕ ඒ අසල බලන් සිටියේය. පොලිස් නිලධාරීන් පසුව කියා සිටියේ අත්අඩංගුවට ගැනීමට තැත් කරද්දී, ෆ්ලොයිඞ් ඊට විරෝධය පෑ නිසා ඔහු යටත් කර ගැනීමට සිදුවුණු බවය. කෙසේ නමුත් අසල අවන්හල්වල සීසීටීවී කැමරා දසුන් අනුව හෝ පොලිස් නිල රථය ඉදිරිපස කැමරාවේ සටහන් වූ දසුන් අනුව හෝ එවැන්නක් පෙනෙන්න නැත. පොලිස් නිලධාරී චෝවින්, ෆ්ලොයිඞ්ගේ ගෙල තද කරගෙන සිටින අයුරු, පදික වේදිකාවේ සිටි බොහෝ දෙනා ඔවුන්ගේ ජංගම දුරකතනවලින් රූගත කරන්න පටන් ගත්තේය. ‘මට හුස්ම ගන්න අමාරුයි. මා මරන්න එපා’ යැයි ෆ්ලොයිඞ් කෙඳිරි ගාද්දී, අසල සිටි පිරිස පොලිසියට විරෝධය දක්වන්න පටන් ගත්හ. ඒ අනුව, පොලිසිය සහ එම පිරිස අතර බහින්බස් වීමක් ඇතිවිය. මේ සියල්ල ජංගම දුරකතනවලින් රූගත කළ වීඩියෝ දසුන්වල පැහැදිලිව දැකිය හැකිය.

හුස්ම ගන්න අමාරුයි කී, 46 හැවිරිදි ජෝජ් ෆ්ලොයිඞ් මියගියේය. මරණ පරීක්ෂණයක් පැවැත්විණි. මරණයට හේතුව හුස්ම හිරවීමක් නොවන බව මරණ පරීක්ෂකගේ නිගමනය විය. ජෝජ් ෆ්ලොයිඞ් ට වෙනත් රෝගී තත්ත්වයක් තිබෙන්න ඇති බවත්, අත්අඩංගුවට ගැනීමේ දී එම රෝගී තත්ත්වය නිසා මරණය සිදුවන්න ඇති බවත් මරණ පරීක්ෂණ වාර්තාවේ සටහන් විය. ෆ්ලොයිඞ්ගේ ගෙල පොලිස් නිලධාරී ඩෙරික් චෝවින් දණහිසෙන් තද කරගෙන සිටින අයුරු සහ තමන්ට හුස්ම ගන්න අමාරු යැයි ෆ්ලොයිඞ් පවසන අයුරු දැක්වෙන වීඩියෝ දර්ශන සමාජ මාධ්‍ය ඔස්සේ සැරිසරන්න විය. ඒවා උදේ සවස ඇමෙරිකන් පුවත් නාළිකා ඔස්සේ ද ප්‍රසිද්ධ විය. එම දර්ශන ලොව පුරා ප්‍රසිද්ධ විය. ඒ අවස්ථාව වනවිට ෆ්ලොයිඞ්ගේ පවුලේ සාමාජිකයෝ නීතීඥවරුන් හරහා ෆ්ලොයිඞ් වෙනුවෙන් සාධාරණයක් ඉල්ලන්න වූහ. ස්වාධීන මරණ පරීක්ෂණයකට අවසර දෙන්නැයි ද ඔවුහු ඉල්ලා සිටියහ. එම ඉල්ලීමට අවසර හිමිවුණු අතර එම ස්වාධීන මරණ පරීක්ෂණයෙන් තහවුරු වූයේ ෆ්ලොයිඞ්, හුස්ම ගැනීමේ අපහසුවෙන්, සිහිසුන් වී මරණය සිදුවුණු බවය.

ෆ්ලොයිඞ් ට අත්වුණු ඉරණම, ‘කොවිඞ් 19’ වයිරස වසංගතයෙන් බැටකන ඇමෙරිකාව උඩු යටිකුරු කළේය. සිද්ධියේ දර්ශන ප්‍රසිද්ධියට පත් වෙද්දී, සිද්ධියට අදාල පොලිස් නිලධාරීන් සිවුදෙනා වහා සේවයෙන් නෙරපා දැමීමට පොලිස් බලධාරීන් කටයුතු කළේය. මිනියැපොලිස් පොලිස් දෙපාර්තමේන්තුව කළ ඉල්ලීමකට අනුව, සිද්ධිය සම්බන්ධයෙන් එෆ්.බී.අයි. පරීක්ෂණයක් පමණක් ද ආරම්භ විය. සේවයෙන් නෙරපා දැමුවත්, මුලදී 44 හැවිරිදි ඩෙරික් චෝවින් හෝ සෙසු පොලිස් නිලධාරීන් තිදෙනා හෝ අත්අඩංගුවට ගැනීමක් සිදුවූයේ නැත. මිනියැපොලිස් නුවර කේන්ද්‍රකොට ගනිමින් විරෝධතා ඇරැඹුණේ ඒ අනුවය. 26 වැනිදා ආරම්භ වුණු එම විරෝධතා සාමකාමී විය. කෙසේ නමුත් බලධාරීන් දිගින් දිගටම නිහඬව සිටිද්දී, විරෝධතා ප්‍රචණ්ඩකාරී විය. අප්‍රිකන් ඇමෙරිකන් කළු ජාතිකයන් පමණක් නොව, ඇමෙරිකන් සුදු ජාතිකයන්, ඇමෙරිකන් ආසියානුවන් ද විරෝධතා සඳහා එක් වූයේ ‘කොවිඞ් 19’ හෙවත් නව කොරෝනා වයිරස තර්ජනය මැදය.  සෞඛ්‍ය උපදෙස් තැකීමක් නොකෙරුණු අතර, සමාජ දුරස්ථභාවයක් පෙනෙන තෙක් මානයක නොවීය. කලහකාරී පිරිස් කඩසාප්පුවලට පහර දී ඒවා කොල්ලකෑමට සහ ගිනි තැබීමට පටන් ගත්හ. රජයේ ගොඩනැගිලි සහ වාහනවලට ප්‍රහාර දුන්හ. මිනියැපොලිස් පොලිස් ස්ථාන දෙකක් ද ගිනිබත් කළහ. ඒ අනුව, එක රැයින් මිනියැපොලිස් නගරය යුද පිටියක් බවට පත්විය.

මිනියැපොලිස් විරෝධතා උත්සන්න වෙද්දී, මිනියැපොලිස් අයත් මිනසෝටා ජනපදයේ ආණ්ඩුකාර ටිම් වොල්ට්ස් මිනියැපොලිස් නගරයට ඇඳිරි නීතිය පනවමින් හමුදාව කැඳවීය. හදිසි ආපදාවකදී සහායට පැමිණෙන මෙම හමුදා සේනාංක හැඳින්වෙන්නේ ජාතික ආරක්ෂක බළකාය (නැෂනල් ගාඞ්) යන නමිනි. ගැටුම් උත්සන්න වෙද්දී, පාලනය කිරීමට නොහැකි වෙද්දී, ඩෙරික් චෝවින් අත්අඩංගුවට ගැණුනි. ඒ, පසුගිය 29 වැනිදාය. පොලිස් අත්අංඩගුවේ සිටිද්දී ජෝජ් ෆ්ලොයිඞ් මරණයට පත් වීම සම්බන්ධයෙන් ඩෙරික් චෝවින් ට මිනීමැරුම් චෝදනා එල්ල විය. මිනසෝටා නීතිපති කීත් එලිසන් මාධ්‍ය හමුවේ කියා සිටියේ සෙසු පොලිස් නිලධාරීන් තිදෙනාට එරෙහිවත් නීතිය ක්‍රියාත්මක කරන බවය. කෙසේ නමුත් පෙරේදා (1) වනවිටත් එවැනි තත්ත්වයක් දකින්න ලැබුණේ නැත. එහෙයින් විරෝධතා තවත් උත්සන්න විය. මිනීමැරුම් චෝදනා එල්ල වුණු පොලිස් නිලධාරී ඩෙරික් චෝවින්ගේ බිරිඳ මිකෙලී ය. මැය මිනෙසෝටා ජනපද රූප සුන්දරිය ලෙස කිරුළු පැලැඳි තැනැත්තියකි. තම සැමියාගේ ‘කෙරුවාව’ දුටු මිකෙලී චෝවින් කම්පනයට පත් වූවාය. ජෝජ් ෆ්ලොයිඞ්ගේ පවුලේ අයට කනගාටුව පළ කරමින්, මිකෙලී චෝවින් සැමියාගෙන් දික්කසාද වීමට තීරණය කළාය.  

ජෝජ් ෆ්ලොයිඞ්ට සාධාරණයක් ඉල්ලමින් මේ වනවිට ඇමෙරිකාව පුරා පැවැත්වෙන විරෝධතා රැලිවලට තේමා වී ඇත්තේ ‘මට හුස්ම ගන්න බැහැ’ (අයි කාන්ට් බ්‍රීත්) සටන් පාඨයයි. ඇමෙරිකාවේ සුදු ජාතික පොලිස් නිලධාරීන් බොහොමයක් අප්‍රිකන් ඇමෙරිකන් කළු ජාතිකයන් දෙස බලන්නේ ඔවුන් අපරාධකරුවන් සේ සලකමිනි. ධනය සහ ආදායම බෙදීයෑම මත ඇමෙරිකා එක්සත් ජනපදයේ පවතින්නේ සමාජ විෂමතාවකි. මේ නිසා කළු ජාතිකයෝ නිරන්තරයෙන් කෙණෙහිලිකම්වලට ලක් වෙති. 2013 සිට 2019 තෙක් කාලයේ ඇමෙරිකාව තුළ පොලිසිය අතින් ඝාතනය වූ පුද්ගලයන් ගණන 7,668 කි. එයින් බහුතරය කළු ජාතිකයන් ය. මෙවැනි තත්ත්වයක් යටතේ පළමු කළු ඇමෙරිකන් ජාතිකයා ලෙස ඩිමොක්‍රටික් පාක්ෂික බැරැක් ඔබාමා ඇමෙරිකාවේ ජනපති පුටුවට යෑම ඓතිහාසික සිදුවීමකි. ඔබාමා මෙන් නොව, ඇමෙරිකක් ජනාධිපති ඩොනල්ඞ් ට්‍රම්ප් සුදු අන්තවාදී අදහස් ඇත්තෙකි. මිනියැපොලිස් සිදුවීම සම්බන්ධයෙන් ජනපති ට්‍රම්ප් අදහස් දැක්වීය. ජෝජ් ෆ්ලොයිඞ් නමැති කළු ජාතිකයාගේ පවුලේ අය සමඟ තමන් දුරකතනයෙන් කතා කළ බවත්, ඔවුන්ට කනගාටුව පළ කළ බවත් ජනපති ට්‍රම්ප් පැවැසුවේ පසුගිය 29 වැනිදා ධවල මන්දිරයේ පැවැති මාධ්‍ය හමුවේදීය.

කෙසේ නමුත් හටගත් විරෝධතා සම්බන්ධයෙන් ජනපති ට්‍රම්ප් මිනියැපොලිස් විරෝධතාකරුවන්ට තර්ජනය කළේය. ඒ, ට්විටර් පණිවුඩයකිනි. ‘ජෝජ් ෆ්ලොයිඞ්ගේ මතකයට කැලැලක් කරන්න මේ මැරයන්ට මා ඉඩ තියන්නේ නැහැ. ඒකට ඉඩ දෙන්න මට බැහැ. මා ආණ්ඩුකාර ටිම් වොල්ට්ස් සමඟ සාකච්ඡා කළා. හමුදාවේ සහාය ඔහුට නොඅඩුව ලැබේවි. සාමකාමී අයුරින් සියල්ල විසඳා ගන්න බලන්න ඕනෑ. හැබැයි කඩසාප්පු කොල්ල කෑමට දේපොල විනාශ කිරීමට පටන් ගත්තොත්, පොලිසිය වෙඩි තියන්න පටන් ගනිවි. මට කරන්න දෙයක් නැහැ’ ට්‍රම්ප්ගේ ට්විටර් පණිවුඩයේ සඳහන් විය. ජනපති ට්‍රම්ප්ගේ මෙම ට්විටර් ප්‍රකාශය ගින්නට පිදුරු දැමීමක් විය. විරෝධතා වොෂින්ටන් අගනුවර ධවල මන්දිරය ඉදිරියට පැතිර ගියේය. කලහකාරී පිරිස් ඊට කඩා වැදීමට පවා උත්සහ ගත්හ. එම අවස්ථාවේ වැඩි ආරක්ෂාවක් සඳහා ජනපති ට්‍රම්ප් ධවල මන්දිරයට පහළින් භූගතව පිහිටි බංකරයට ගෙන ගොස් සඟවා තැබීමට සීක්‍රට් සර්විස් හෙවත් ජනපති ආරක්ෂක නිලධාරීහු කටයුතු කළහ. ධවල මන්දිරය ඉදිරිපිට හටගත් ගැටුම්වලින් ජනපති ආරක්ෂක අංශ සාමාජිකයෝ 50 දෙනකු තුවාල ලැබූ බව ද වාර්තා විය. ධවල මන්දිරය සහ ඒ අවට විරෝධතා උත්සන්න වී විරෝධතාකරුවන් ප්‍රචණ්ඩකාරී වෙද්දී, හමුදා සේනාංක කැඳවීම බලධාරීහු පියවර ගත්හ. ඒ අනුව, ‘නැෂනල් ගාඞ්’ හමුදා සොල්දාදුවෝ 1,700 ක පිරිසක් වොෂින්ටන් අගනුවරට පැමිණියහ.

ජනාධිපති ඩොනල්ඞ් ට්‍රම්ප් නීතිපති බිල් බාර් හමුවී, හටගත් නොසන්සුන්කාරී තත්ත්වය සම්බන්ධයෙන් ගත යුතු ක්‍රියා මාර්ග මොනවාදැයි සාකච්ඡා කළේය. ජනපති ට්‍රම්ප් සහ නීතිපතිවරයා අතර හමුව පැවැත්වූයේ ධවල මන්දිරයේ ඕවල් කාර්යාලයේදීය. ඊට අමතරව, රිපබ්ලිකන් ජනාධිපති ට්‍රම්ප්, ඇමෙරිකන් ජනපද ආණ්ඩුකාරවරුන්, පොලිස් ප්‍රධානීන් ඇතුළු නීති නිලධාරීන් හමුවී සාකච්ඡා කළේය.  විරෝධතා මර්දනය කිරීමට හෝ විරෝධතාකරුවන් සන්සුන් කිරීමට හෝ ජනපති ට්‍රම්ප් ට හැකියාවක් ලැබී නැත. ට්‍රම්ප් සියලුම ජනපදවල සියලුම පොලිස් ස්ථානවලට පවසා ඇත්තේ විරෝධතාකරුවන්ට කිසිදු බුරුලක් ලබා නොදෙන ලෙසය. පෙරේදා (1) වනවිට පොලිස් අත්අඩංගුවට ගත් විරෝධතාකරුවන් ගණන 4,000 ට වැඩිය. ඒ අතර මාධ්‍යවේදීහු ද සිටිති. පොලිසිය විරෝධතාකරුවන්ට පන්න පන්නා පහර දෙයි. පොලිස් නිලධාරීන් සමඟ හටගත් ගැටුම් උත්සන්න වීමෙන් මියගිය ඇමෙරිකානුවන් ගණන 6 කි. තුවාල ලැබූ පොලිස් නිලධාරීන් ගණන 33 කි. පොලිස් රථ 47 ක් ගිනි තබා විනාශ කෙරුණි. ජෝජ් ෆ්ලොයිඞ් මියයෑමේ සිදුවීම සම්බන්ධයෙන් ඇරැඹි විරෝධතා වොෂින්ටන් අගනුවරට, නිව්යෝක් නුවරට පැතිර ගියේය. බොහෝ පොලිස් නිලධාරීන් විරෝධතාකරුවන් සමඟ ගැටෙද්දී, නිව්යෝක් සහ ෆ්ලොරීඩා ජනපදවල ඇතැම් නගරවල ඇතැම් පොලිස් නිලධාරීහු විරෝධතාකරුවන් අසලට පැමිණ දණ නවා පහත් වී ජෝජ් ෆ්ලොයිඞ් ඝාතනය හෙලා දැකීමට කටයුතු කළහ. එමෙන්ම, විරෝධතාකරුවන්ට සහාය පළ කරමින්, ජෝජ් ෆ්ලොයිඞ් වෙනුවෙන් සාධාරණයක් ඉටුවිය යුතු බව ද පැවැසූහ. ඒ, අනුව, එම නගරවල විරෝධතා ප්‍රචණ්ඩකාරී ස්වරූපයක් ගත්තේ නැත. පොලිස් නිලධාරීන් කළේ නුවණැති ක්‍රියාවකි.

ජෝජ් ෆ්ලොයිඞ් මියයෑමේ සිදුවීම ජාත්‍යන්තරයට ද ගියේය. යුරෝපයේ ලන්ඩන්, බර්ලීන් සහ කෝපන්හේගන් යන නගරවල ද ‘කොවිඞ් 19’ තහංචි මැද විරෝධතා පැවැත්විණි. සිරියාවේ ගැටුම්වලින් අවතැන් වූවෝ ද ‘අයි කාන්ට් බී්‍රත්’ (මට හුස්ම ගන්න බැහැ) සටන් පුවරු සමඟ ඇමෙරිකන් පොලිසියට සහ රජයට අප්‍රසාදය පළ කරන්න වූහ. සිරියානු චිත්‍ර ශිල්පීන් පිරිසක් ජෝජ් ෆ්ලොයිඞ්ගේ රුව සිතුවමට නැගූහ. එය ජාත්‍යන්තර පුවත් සේවා හරහා දැක ගන්න හැකිවිය. ‘කඵ ජාතිකයන්ගේ ජීවිත සුරකින්නැයි’ මධ්‍යම ලන්ඩන් නුවර පැවැති විරෝධතා ප්‍රචණ්ඩකාරී ස්වරූපයක් ගත්තේය. විරෝධතා පැවැත්වූයේ පාර්ලිමේන්තු චතුරස්‍රය අසලය. විරෝධතාව ආරම්භ වූයේ සාමකාමීවය. කෙසේ නමුත් විරෝධතාකරුවන් එම ස්ථානයෙන් ඉවත් කිරීමට පොලිසියට ක්‍රියා කළේය. විරෝධතා ප්‍රචණ්ඩ වූයේ ඒ අනුවය. විරෝධතාකරුවෝ 23 දෙනෙක් පොලිස් අත්අඩංගුවට පත්වූහ.

ජෝජ් ෆ්ලොයිඞ්ට සිදුවුණු අසාධාරණය සම්බන්ධයෙන් සහ ඇමෙරිකන් විරෝධතාකරුවන් සිත්පිත් නැති අයුරින් මර්දනය කිරීම සම්බන්ධයෙන් නවසීලන්තයේ ද සාමකාමී විරෝධතාවක් පැවැත්විණි. ඒ, ‘කොවිඞ් 19’ හෙවත් නව කොරෝනා වයිරසය පාලනය කිරීමට සෞඛ්‍ය අංශ ලබා දී ඇති උපදෙස්වලට ගරු කරමිනි. ඕස්ටේ්‍රලියාවේ සිඞ්නි නුවර හයිඞ් පාක් උද්‍යානයේ ද විරෝධතාවක් සංවිධානය කර තිබුණු නමුත්, එය ප්‍රචණ්ඩකාරී ස්වරූපයක් ගනු ඇතැයි සංවිධායකයෝ බිය වූහ. ‘කොවිඞ් 19’ වයිරස උවදුර තවමත් පවතින බැවින්, එම විරෝධතාව අවලංගු කෙරුණි. ජෝජ් ෆ්ලොයිඞ් සම්බන්ධ සිදුවීම මුල්කොට ගනිමින්, ඇමෙරිකන් ජාතික ආරක්ෂක උපදේශක රොබට් ඕ බ්‍රයන් ඇමෙරිකාවේ ඒ.බී.සී. පුවත් නාළිකාව ඔස්සේ සම්මුඛ සාකච්ඡාවකට එක් වී අදහස් දැක්වීය. එහිදී බ්‍රයන් කියා සිටියේ, සිම්බාබ්බේ රාජ්‍යයේත් චීනයේත් මේ අයුරින් වාර්ගික නොසන්සුන්තා හටගන්නා බවත්, විදේශීය බලවේග සමාජ මාධ්‍ය ඔස්සේ නැති ප්‍රශ්න ඇති කරන බවත්ය. ජාතික ආරක්ෂක උපදේශක රොබට් ඕ බ්‍රයන්  කළ මෙම ප්‍රකාශයේ අර්ථය කුමක්දැයි පැහැදිලි කරන්නැයි, සිම්බාබ්බේ රජය, එරට ඇමෙරිකන් තානාපති බ්‍රයන් නිකොල්ස් කැඳවා විමසීමක් කළේය.

ලොව අනෙක් රටවල වැරැදි පෙන්වා දෙන ඇමෙරිකාවට තමන්ගේ වැරැදි නොපෙනනවා යැයි ඉරානයත් චීනයත් චෝදනා කරයි. ඇමෙරිකාවේ පවතින සමාජ විෂමතාව සහ වාර්ගික ගැටුම් සම්බන්ධයෙන් පැහැදිලි විසඳුමක් දීමට ඇමෙරිකන් බලධාරීන් අපොහොසත් වී ඇතැයි චීනය නිකුත් කළ නිවේදනයක දැක්වෙයි. ඉරානය සහ ඇමෙරිකාව අතර පවතින එදිරිවාදිකම් ට්‍රම්ප් පරිපාලනය යටතේ උත්සන්න විය. ජනපති ට්‍රම්ප් ඉරානයට දිගට හරහට සම්බාධක පනවා ඇත. ඒ, ඉරාන න්‍යෂ්ටික වැඩසටහන මුල්කොට ගනිමිනි. ඉරානයේ දරුණු ‘කොවිඞ් 19’ වසංගත තත්ත්වයක් නිර්මාණය වූයේ ද මෙම සම්බාධක හේතුවෙනි. ‘කොවිඞ් 19’ වයිරස වසංගතය හමුවේ වුවත් එම සම්බාධක ලිහිල් කිරීමට ජනපති ට්‍රම්ප් කැමැත්තක් දැක්වූයේ නැත. ඉරාන විදේශ කටයුතු අමත්‍යාංශය වෙනුවෙන් එහි ප්‍රකාශක අබ්බාස් මුසොවානී, ඇමෙරිකන් රජයෙන් සහ පොලිසියෙන් ඉල්ලීමක් කර ඇත්තේ ප්‍රචණ්ඩ ක්‍රියා වහා නැවැත්වීමට කටයුතු කරන ලෙසය.

ලුසිත ජයමාන්න
ඒ.එෆ්.පී. ඇසුරිනි


RECOMMEND POSTS